Qazaqstanda oqýshylarǵa arnalǵan olimpiadalardyń sany keńeitildi. Bul týraly QR Bilim jáne ǵylym vitse-ministri Sholpan Karinova aitty, dep habarlaidy QazAqparat.
«Ana-analar men mektepter úshin taǵy bir aqparatty jetkizbekpin. Bilim jáne ǵylym ministrliginiń olimpiadalar tizbesin bekitý boiynsha tiisti ózgerister engizildi. Bul óz kezeginde sapalyq ózgeristerge qatysty. Osy jylǵa deiingi olimpiadalardyń tizbesinde 56 olimpiadalyq is-shara qarastyrylǵan bolsa, búgingi kúni bekitilgen tizimde 175 is-sharaǵa deiin keńeitildi. Ártúrli baǵyttarda daryndylyqty anyqtaityn olimpiadalardyń sany ǵana emes, jarystardyń sapalyq sipattalamalary da ózgerdi», - dedi Sh. Karinova Ortalyq kommýnikatsiialar qyzmetinde.
Onyń aitýynsha, endi barlyq olimpiadanyń mekteptik, aýdandyq, qalalyq, oblystyq jáne respýblikalyq deńgeileri bolýy shart.
«Bul balalardy yntalandyrý úshin mańyzdy ári pedagogtardyń eńbegin kótermeleý turǵysynan da kerek. Óitkeni nátijeler olardyń qyzmetin, biliktiligin baǵalaý kezinde elektrondy túrde muǵalimnen suraýsyz eskeriletin bolady. Ekinshiden, bastaýysh synyp oqýshylary men orta býyn oqýshylary úshin buǵan deiin tizbede eshbir olimpiadalar qarastyrylmaǵan edi. Qazirgi tizbege osy býyndar boiynsha tiisti olimpiadalar negizgi pánder turǵysynan qarastyryldy», - dedi vitse-ministr.
Budan bólek, aýyl oqýshylary úshin ziiatkerlik jarystar qarastyrylyp otyr. Olar óte mańyzdy, óitkeni kóp jaǵdaida aýyldyq oqýshylar qalalyq gimnaziia, litsei oqýshylarymen birge qatysyp, básekelesýge múmkindikteri bolmai jatady.
Munymen qosa, daryndy balalarǵa arnalǵan mamandandyrylǵan uiymdar úshin ziiatkerlik jarystar qarastyryldy.
«Sondai-aq mektep oqýshylaryna arnalǵan joǵary oqý oryndarynyń olimpiadalary anyqtaldy. Olardyń maqsaty – mamandyqqa tartý, kásipterdi igerý úshin tereńdetilgen bilimderdi anyqtaý, kásiptik baǵdarlaý jumysy», - dedi Sholpan Karinova.
«Endi oqý jylynyń basynda barlyq uiym olimpiadalar men konkýrstardy ótkizý týraly erejelerdi, ondaǵy baǵalaý ólshemshartyn, qatysý sharttaryn, ótkizý merzimderin atap, tolyq aqparatty bilim mekemelerine jetkizetin bolady. Barsha jarysqa qatysýshylardyń bazasy jáne olardyń nátijeleri Ulttyq derekter qory júiesinde elektrondy túrde qoljetimdi bolady. Sonymen birge, jarystar tizbesinde ekologiia, SMART- tehnologiialar máseleleri, konkýrstar men olimpiadalar, zertteý konkýrstary engizildi», - dedi vitse-ministr.
