Halyq arasynda «shańsorǵysh» atanǵan ýniversitetterdiń litsenziialaryn qaitaryp alý jumystary júrgizilip jatyr. Bul týraly QR BǴM Bilim jáne ǵylym salasyndaǵy baqylaý komitetiniń tóraiymy Gúlzat Kóbenova aitty, dep habarlaidy QazAqparat tilshisi.
Ministrliktiń Facebook-paraqshasynda ótken onlain-brifing barysynda ol sońǵy ýaqytta keibir joǵary oqý oryndary nelikten «shańsorǵysh» atanyp ketkendigine toqtaldy.
«Sebebi, bul JOO-larǵa basqa JOO-lardan nemese sheteldik JOO-lardan aýysyp kelip jatqan stýdentter óte kóp. Mundai ýniversitetterdiń qatarynda Qazaqstan innovatsiialyq jáne telekommýnikatsiialyq júieler ýniversiteti, Óńirlik áleýmettik-innovatsiialyq ýniversiteti men basqa JOO-lar bar. Bul rette, ministrlik óz tarapynan mundai JOO-larmen kúresýdi kózdep otyr. Osy jyly Óńirlik áleýmettik-innovatsiialyq ýniversitet sot sheshimimen litsenziiasynan aiyryldy. Búgingi tańda 2 JOO-nyń litsenziiasy ýaqytsha toqtatyldy. Ol - Qonaev atyndaǵy Eýraziia zań akademiiasy jáne Qazaq eńbek jáne áleýmettik qatynastar akademiiasy»,- dedi ol.
Komitet tóraiymy keibir joǵary oqý oryndary litsenziialarynyń qosymshalarynan aiyrylǵanyn aitady.
«Mysaly, Syrdariia ýniversiteti. 4 JOO óz tarapynan keibir litsenziialarynyń qosymshalaryn qaitardy. Sebebi professorlyq-oqytýshylyq quramy jetispeidi nemese materialdyq-tehnikalyq bazasy sáikes kelmeidi. Al Taldyqorǵandaǵy Joldasbekov atyndaǵy ekonomika jáne quqyq akademiiasy osy oqý jyly aiaqtalǵan soń, óz erkimen litsenziiasyn qaitarady», - dedi Gúlzat Kóbenova.
