Bilim jáne ǵylym ministrligi EKSPO biletterin satyp alýǵa májbúrlemeýge shaqyrdy, dep habarlaidy "Ult aqparat" ministrliktiń baspasóz qyzmetine silteme jasap.
"EKSPO-2017 kórmesi árbir qazaqstandyqtyń maqtanyshyna ainalýy tiis, sondyqtan da kópshiliktiń osynaý álemdik mańyzy bar aýqymdy sharanyń ótkizilý qurmeti elimizdiń enshisine tigendikten, oǵan qatysý nieti, biletterdi satyp alýy – patriotizmniń belgisi" - delingen ministrliktiń baspasóz qyzmeti taratqan aqparatta.
"Bilim jáne ǵylym ministrligi men EKSPO basshylyqtary jergilikti atqarýshy organdardyń, basqa da uiymdardyń basshylaryn muǵalimderdi kórme biletterin satyp alýǵa májbúrlemeýge shaqyrady. Óz tarapynan QR BǴM kórme biletterin satyp alýǵa bailanysty qandai da bir buiryq jasamaǵanyn, sonymen qatar mundai áreketterge qarsy ekendigin jetkizedi" deidi QR BǴM.
Sondai-aq olardyń aitýynsha, halyqaralyq kórme bastalar aldynda aýqymdy túsindirý jáne nasihattaý jumystary júrgizilip, sharanyń máni men mańyzyn, onyń zamanalyq hám álemdik deńgeidegi oqiǵa ekendigin jetkizip, kópshiliktiń shynaiy qyzyǵýshylyǵyn týdyrý qajet.
"Shyn máninde, qazaqstandyqtar óz jerinde buryn-sońdy bolmaǵan sharaǵa qatysyp, kórme pavilondaryn kórip, otandyq qana emes, EKSPO – 2017 kórmesine qatysý nietin bildirip, daiyndalyp jatqan elderdiń mádeniet, ekonomika, ǵylym, jańa tehnologiialar – qai salalary bolmasyn, búgingi eń úzdik úlgilerimen tanysýdyń birden-bir múmkindigine ie bolyp otyr", - delingen habarlamada.
"Búgin el ordasy Astana osynaý dúbirli oqiǵanyń bastalýyn taǵatsyzdana kútip, ǵalamat daiyndyq jumystaryn aiaqtap jatyr: aitýly sharaǵa qajetti, halyqaralyq standarttarǵa sai infraqurylymdy qurý jumystary da aiaqtalyp keledi – EKSPO – 2017 kórmesine qatysam degen árbir adam úshin esik keńinen ashylmaq!" deidi baspasóz ókilderi.
