2019 jyldan bastap balabaqsha meńgerýshileriniń, tárbieshiler men ádiskerlerdiń jalaqysy ósedi. Sondai-aq mektep direktorlary men orynbasarlarynyń eńbekaqysyn kóterý josparlanyp otyr. Bul týraly búgin bilim jáne ǵylym vitse-ministri Bibigúl Asylova málimdedi, dep habarlaidy Sputnik Qazaqstan tilshisi.
Asylovanyń aitýynsha, Qazaqstan prezidentiniń joldaýynda aitylǵan tapsyrmalardy oryndaý maqsatynda 2019 jyldan bastap bilim salasyna jumsalatyn shyǵystar ulǵaitylady.
"Kelesi jyldan bastap 2023 jylǵa deiin bilim salasyndaǵy shyǵystar ulǵaitylady. Bizge bólinetin qarajat aiasynda 2019 jyldan bastap tárbieshilerdiń, ádiskerler men balabaqsha meńgerýshileriniń jalaqysyn ósirý josparlanyp otyr. Buǵan qosa, "pedagogtardyń mártebesi" týraly zań aiasynda mektep direktorlary men olardyń orynbasarlarynyń jalaqysyn kóbeitý kózdelgen. Sondai-aq, ustazdardy qoldaý maqsatynda synyp jetekshiligi men dápter tekserý boiynsha qosymsha aqy tólenedi", — dedi vitse-ministr úkimet úiinde ótken baspasóz máslihatynda.
Bilim jáne ǵylym vitse-ministri Elmira Sýhanberdievanyń aitýynsha, tárbieshiler, ádiskerler men balabaqsha meńgerýshileri úshin 30-dan 50 protsentke deiin ústemaqy engiziledi.
"Jergilikti atqarýshy organdarmen birlesip jol kartasyn ázirledik. Jumys toby qurylýda. Bizde orta mektep muǵalimderi úshin ulttyq biliktilik testi daiyn. Qazir endi tárbieshilerdiń ulttyq biliktilik testine kirisemiz. Balabaqsha tárbieshileri, ádiskerler men balabaqsha meńgerýshileri úshin ústemaqy engiziledi. 30-dan 50 protsentke deiin. Ulttyq biliktilik testiniń qorytyndysy boiynsha eńbekaqylary ósedi. Osyndai aýqymdy jumysty bastap jatyrmyz", — dedi Sýhanberdieva.
