Aldaǵy úsh jylda kolledjderde kadr daiyndaý úshin qosymsha 21 mlrd teńge qajet. Bul týraly búgin Úkimet otyrysynda «Nátijeli jumyspen qamtý jáne jappai kásipkerlikti damytý baǵdarlamasy» týraly baiandaǵan Bilim jáne ǵylym vitse-ministri Bibigúl Asylova aitty, dep habarlaidy QazAqparat tilshisi.
«Birinshi, Qyzylorda oblysynda baǵdarlama aiasynda 1515 adamdy kolledjde oqytý kózdelgen. Biraq, ákimdik 500 adamǵa memlekettik tapsyrys bólgen. Ákimdik málimeti boiynsha, Eńbek ministrligi respýblikalyq biýdjetten tolyq kólemde qarjy bólmei, másele týyndap otyr», - dedi ol baǵdarlamany júzege asyrýdaǵy túitkilderge toqtala kele.
Ekinshiden, onyń sózine qaraǵanda, kelesi oqý jylynda kadrlardy oqytý boiynsha qosymsha qajettilik bar. 10 oblys ákimdikterimen 8829 adamǵa qosymsha qajettilik rastaldy. 7 óńirdiń málimeti boiynsha, kadrlarǵa ondai qajettilik joq.
«Jalpy, úsh jylǵa qajettilik 21 mlrd teńgeni quraidy. Eger qoldaý tapsa, ministrlik tiisti biýdjettik ótinimdi jasaidy», - dedi vitse-ministr.
