QR Bilim jáne ǵylym ministrligi Halyqaralyq internetsiz kúnine orai «Men OFFLINE» respýblikalyq keń aýqymdy balalar aktsiiasyn ótkizedi, dep habarlaidy "Ult aqparat" ministrliktiń baspasóz qyzmetine silteme jasap.
«Búgingi tańda balalardyń smartfonnan nemese planshetten alshaqtaýyna kelisim bermeýi ár ata-anaǵa tanys jaǵdai. «Taǵy da 5 minýt, sosyn boldy», «Men jańa ǵana aldym ǵoi» siiaqty sózder kúndelikti qalypty qubylysqa ainaldy. Dúniejúzilik statistika boiynsha, halyqtyń shamamen 50 paiyzy qandai da bir áleýmettik jelide, al keibireýleri tipti birden barlyq áleýmettik jelilerge tirkelgen», - delingen ministrliktiń baspasóz habarlamasynda.
Internetke táýeldiliktiń aldyn alý, kámeletke tolmaǵandardyń internettegi belsendiligin baqylaý, eresek internet-qyzmetterdi paidalanýshylardyń jaýapkershiligin, internet paidalaný mádenietin arttyrý maqsatynda Qazaqstan Respýblikasy Bilim jáne ǵylym ministrligi 2019 jylǵy 27 qańtar - Halyqaralyq internetsiz kúnine orai «Men OFFLINE» respýblikalyq keń aýqymdy balalar aktsiiasyn ótkizedi.
«Atalǵan is-shara oqýshylardy smartfonnan, kompiýterden jáne jahandyq jeliden alshaqtatý, bul kúndi tek qana shynaiy álemde ómir súrýge, jaqyn adamdarmen qarym-qatynas jasaýǵa nemese ony súiikti hobbiine arnaýǵa kómektesedi», - dep habarlaidy ministrlikten.
Aktsiiamen respýblikadaǵy barlyq 1-11 synyp oqýshylaryn qamtý josparlanyp otyr. Oblystardyń, Astana, Almaty jáne Shymkent qalalarynyń bilim basqarmalary 1-4 synyptarǵa arnalǵan «Internetsiz kúndi qalai ótkizdim» atty sýret baiqaýyn, 5-11 synyp oqýshylaryna arnalǵan «Men OFFLINE» esse baiqaýyn uiymdastyrady. Jumystar Qazaqstan Respýblikasy Bilim jáne ǵylym ministrligi Balalardyń quqyqtaryn qorǵaý komitetiniń Facebook-tegi resmi paraqshasynda jariialanady.
