QR Bilim jáne ǵylym ministri Erlan Saǵadiev ulttyq biliktilik testileýin tapsyra almaǵan muǵalimderge eshqandai jazalaý sharalary qoldanylmaitynyna ýáde etti, dep habarlaidy QazAqparat tilshisi.
«Mamyr aiynda muǵalimder ulttyq biliktilik testileýin tapsyrýdy bastaidy. Eger de kópshiligi ózderiniń biliktiligin dáleldei almasa, onda biz eshqandai jazalaý sharalaryn qabyldamaimyz. Erejege sáikes, olar test tapsyrmasa, onda burynǵy dárejesimen jáne eńbekaqysymen jumysyn jalǵastyrady. Muǵalimderge qatysty eshqandai quqyqtyq saldar qarastyrylmaidy», - dedi ministr.
Sonymen qatar ol ákimdikterdiń áldebir kvotalar engizip, muǵalimderge jazalaý sharalary qoldanylatyndyǵymen qorqytyp jatqandaǵy týraly sybystar ministrlikke jetip jatqandyǵyn aitty.
«Biz osyndai qadamdarǵa barmaýdy ótinemiz. Muǵalimderde ulttyq biliktilik testileýine daiyndalýǵa qajetti ýaqyty bolýy kerek. Sonymen qatar pedagogtar ony qashan tapsyrsa da ózderi biledi. Sáikesinshe, eshqandai da májbúrleý bolmaýy kerek», - dedi BǴM basshysy.
Onyń sózine qaraǵanda, atalǵan testileýdi tapsyrýǵa óz erkimen 60 myń muǵalim jazylǵan. «Bul óz kezeginde muǵalimder ózderiniń biliktiligine senimdi ekenin, óz pánin jaqsy biletinin bildiredi. Ol 26 mamyrda bastalyp, birneshe kúnge sozylady», - dedi ol.
