Bilim qyzmetkerleriniń kásibi merekesi qarsańynda aimaqqa jumys saparymen kelgen Bilim jáne ǵylym ministri Erlan Saǵadiev Glýbokoe aýdanyndaǵy Ývarov orta mektebiniń ujymymen kezdesti. Ministrdiń pedagogtarmen bolǵan kezdesýine oblys ákiminiń orynbasary Jaqsylyq Omar qatysty.
Ustazdar qaýymymen júzdesken Erlan Saǵadiev elimizdiń bilim berý júiesine engizilip jatqan jańalyqtar jaiynda baiandap, ministrliktiń qolǵa alyp jatqan sharýasynyń qanshalyqty durys ekenine kóz jetkizdi. Ministr muǵalimderdi kásibi merekemen quttyqtap, aimaqtyń bilim berý salasynda kóptegen qanatqaqty jobalardyń qolǵa alynyp jatqanyn, eger engizilip jatqan jańalyqtar jemisti júzege assa, tájiribe respýblikanyń ózge aimaqtaryna taratylatynyn tilge tiek etti.
Shyǵys Qazaqstan oblysy pedagogtarymen kezdesý orny beker tańdalyp alynǵan joq. Ývarov aýylyndaǵy bul bilim berý mekemesi byltyr ǵana paidalanýǵa berilgen bolatyn. Mektep túlekteri Ulttyq biryńǵai testileý barysynda eń joǵarǵy kórsetkishterimen erekshelenedi. Ártúrli eksperimentterge qatysyp, ozyq nátije kórsetetin de osy mektep. Zamanaýi materialdy-tehnikalyq quraldarmen jabdyqtalýy, qolaily jaǵdai oqýshylardyń jaqsy jetistikke jetýine yqpal etedi.
Erlan Saǵadiev mektepke deiingi mekemelerge qandai talaptar engizilgeni týraly da baiandady. Endi jatyn bólmelerdi oiyn bólmelerimen biriktirýge de bolady. Buryn oǵan tyiym salynǵan bolatyn. Bul ózgeris birinshiden, balabaqshadaǵy oryn sanyn arttyryp, kezekte turǵan balalardyń sanynyń qysqarýyna septigin tigizedi. Ekinshi úlken ózgeris tamaqqa bailanysty. Osydan bylai balalar taǵamy kombinattaryna balabaqshaǵa taǵam jetkizip berýge ruqsat etiledi. Iaǵni, endi árbir balabaqshada aspazshy men as bólmesiniń bolýy mindetti emes. Bul balabaqsha ujymyndaǵy qyzmetkerlerdiń bilim berý, tárbie jumystarymen alańsyz ainalysýyna múmkindik beredi.
Ministr jaqyn arada mektepterge arnalǵan jańa sanitarlyq normalar men erejelerdiń jasalatynyn jetkizdi. Ózgeristerde jańa sporttyq synyptardyń bolýy da qarastyrylýda. Jańa ózgerister tipti bizdiń aimaqta engizilip jatqan da kórinedi. Sonymen qatar, ministrlik fýtbol, hokkei jáne dene tárbiesi baǵdarlamasyndaǵy basqa da oiyndardyń saǵatyn arttyrýdy kózdep otyr. Al kásibi sportshylardy dene tárbiesi páninen múldem bosatý qajet.
Qazaqstandyq oqýshylardyń sabaq úlgerimin bilip otyrý úshin elimizdiń barlyq mektepterinde elektrondy kúndelik engiziledi. Ministrdiń aitýynsha, bul elektrondy oqýlyqtardyń álsiz tusyn anyqtaýǵa mursat beredi.
- Mysaly, elimizdegi oqýshylar fizika páni boiynsha optika taqyrybyn túsinbei qalsa, iaǵni bul oqýlyqta kinárat bar degendi bildiredi. Bul kemshilikpen mamandar ári qarai jumys isteitin bolady, - dep túsindirdi Erlan Saǵadiev.
Orys mektepterinde bilim alatyn oqýshylardyń barlyǵy birdei memlekettik tilde erkin sóilei almaidy. Qazaqstannyń eń úzdik úsh ýniversitetiniń ǵalymdary qazaq tilin oqytýdaǵy bul kemshilikti joiýǵa kúsh saldy. Mamandar jańa ádistemeni jasap, oqýshylardyń kúndelikti ómirde jii qoldanatyn sózderdi jinaqtaýda. Bul sóz qory jyl saiyn tolyǵyp otyratyn bolady. Múmkin oqýshylardy bilim deńgeii boiynsha oqytatyn, tildi nashar meńgergen oqýshy myqtylardy qýyp jetýge yqpal etetin qosymsha oqýlyqtar da ázirlenedi. Munyń bári kelesi jyldan bastap iske asyryla bastaidy.
- Biyl biz tórt myń aǵylshyn tili páni muǵalimin oqytýdyń jańa kommýnikativti ádisi boiynsha oqytýdy bastaimyz. Oqý tórt aidan toǵyz aiǵa deiin sozylýy múmkin. Biraq bul ýaqytta muǵalimniń jumys orny saqtalyp, stipendiia da tólenedi, kelý-ketý jolaqasy, tamaǵy, bári de tólenedi. Tájiribege de qaraimyz. Qatyp qalǵan eshteńe joq, árqashan ózgerister engizýge bolady, biraq ázirge ózgerister engizýdi josparlap otyrǵan joqpyz. Máseleni birjaqty ǵana alyp qarasaq, eshteńe de ózgermeidi, - deidi ministr.
Ývarovadaǵy kezdesýde mektepter men kolledjderdiń direktorlary ministr Erlan Saǵadievpen tolǵandyrǵan máselelerdi talqylap, ózderiniń usynystaryn da aitty. Eń aldymen óńir pedagogtaryn mektep túlekteriniń kórshi memleketterge aǵylýy mazalaidy. Muǵalimderdiń pikirinshe, mektep túlekteri grantqa túsý úshin Qazaqstannan qashady.
- Reseidiń ýniversitetterine beriletin granttar 10-shy maýsymda-aq saittarda jaryq kóredi, - deidi oblystyq bilim basqarmasynyń basshysy Aijan Sadyqova. – Bul kezde mektep bitirýshiler memlekettik tapsyryspen qandai baǵytqa, qandai oryn bólingenin bilip otyrady. Bizde de osy jaǵyn eskerý qajet. Erterek habarlasaq, balalar úmittenedi. Al bizde mundai málimetter tek tamyzda ǵana belgili bolady.
Sonymen qatar, shyǵysqazaqstandyq pedagogtar kolledjderde «Serpin» baǵdarlamasyn iske asyrýdy toqtatyp, ony joǵary oqý oryndaryna yńǵailaý qajettigin usyndy. Olar ózderiniń bul usynystaryn kolledjge túsetinderdiń tańdaýdy sanaly túrde, oilanyp-tolǵanyp jasamaityndyǵymen túsindirdi. Nátijesinde olardyń kópshiligi mamanǵa qat óńirde qalmai, óziniń týǵan jerine oralady.
Ývarov orta mektebiniń muǵalimderi birinshi synyp oqýshylaryn jańadan shyqqan matematika oqýlyǵy boiynsha oqytýdyń qiyndyǵyn ashyp aitty. Onda ótken taqyryptardy qaitalap, bekitýge kóńil bólinbeidi. Budan basqa birinshi synyp oqýshylary ekinshi synypta ótetin taqyryptardy oqýǵa májbúr.
Erlan Saǵadiev óńir pedagogtarynyń barlyq usynystaryn tyńdap, kókeikesti máselelerdiń túiinin tarqatýǵa ýáde etti.
Gúlmira Asipova
Sýretterdi túsirgen - Manap Murzataev
