QR Bilim jáne ǵylym ministri Kúlásh Shámshidinova III jáne IV toqsan arasyndaǵy demalystardy beri qarai jyljytyp, oqýshylar men stýdentterge Naýryz meiramyn toilaýǵa 10 kún berý máselesine qatysty pikir bildirdi, dep xabarlaidy QazAqparat tilshisi.
Atalǵan usynysty QR Mádeniet jáne sport ministri Arystanbek Muxamediuly jasaǵan bolatyn.
«Mysaly, kúntizbelik Jańa jyl - 1 qańtar óziniń myqty ideologiiasymen, san alýan belgilerimen otbasylyq merekege ainalǵany málim. Bul oraida, stýdentter men oqýshylardyń ulttyq meiramdy otbasynda, jaqyndarynyń janynda qarsy alýǵa múmkindik týǵyzý maqsatynda 14-23 naýryz aralyǵynda (10 kún) naýryz demalysy belgilenýi tiis. Bul jerde mektep oqýshylarynyń burynǵy 24 naýryz ben 1 sáýir aralyǵyndaǵy III-toqsan demalysy on kúnge jyljyp, olar osy Naýryz meiramyn otbasymen, aǵaiyn-týmalarymen qarsy alýǵa múmkindik alar edi», - dep jazdy A.Muxamediuly áleýmettik jelidegi paraqshasynda.
Onyń sózine qaraǵanda, onkúndik demalysty beri qarai jyljytsa, III jáne IV toqsannyń tepe-teńdigin de saqtaýǵa múmkindik bar. Máselen, III toqsan 10 qańtar men 24 naýryz aralyǵyndaǵy 74 kúndi qamtidy, al IV toqsan 1 sáýir men 24 mamyrdy alyp otyr. Ol - 54 kún. Jańa nusqa boiynsha oqýshylar men stýdentterdiń 10 kúndik demalysy beri qarai jyljyp, 14-24 naýryzǵa kelse, III toqsan (64 kún) jáne IV toqsan (61 kún) teńesedi. Al qazaqstandyqtar Naýryz meiramyn jańasha toilai alady.
QR Bilim jáne ǵylym ministri Kúlásh Shámshidinovanyń aitýynsha, atalǵan máseleni jan-jaqty zerdeleý kerek. Sebebi oqý baǵdarlamasyna sáikes, árbir toqsannyń óz jospary bar.
«Biz ony áli qaraǵan joqpyz, qaraýymyz qajet. 10 kúndi jyljytý bolǵanymen bizde naqty oqý baǵdarlamasy bar. Al III toqsannyń josparyn aiaqtaý qajet. Eger ony ózgertetin bolsaq, oqý baǵdarlamasynyń materialyn II toqsanǵa kóterýimiz kerek, nemese IV toqsanǵa túsirýimiz kerek. Sol sebepti onyń bárin qaramai, qazir birden aýystyra salamyn dep, eshkim aita almaidy. Oqý baǵdarlamasyn árbir synyp boiynsha qaraý qajet. Árbir synyptyń baǵdarlamasyn jeke-jeke qaraýymyz kerek», - dedi K.Shámshidinova.
