QR Bilim jáne ǵylym ministri Ashat Aimaǵambetov suhbaty áleýmettik jelide keńinen taraǵan kókshetaýlyq muǵalimmen kezdesý bolǵanyn aitty, dep habarlaidy "Ult aqparat".
«Ol muǵalimmen kezdestik, biraz áńgimelestik. Jalpy, kóp suraqtaryna jaýap berdik. Negizinen, muny júieli túrde qarastyrý kerek, tek bir muǵalimniń máselesi emes, iaǵni bul jalpy ustazdardyń máselesi. Buny Elbasy da, Memleket basshysy da kóterdi. Osy oraida tiisti tapsyrmalardy berilip, qajetti qarjy bólinip jatyr. Sondyqtan bizdiń aldymyzda júktelgen tapsyrmany tiimdi oryndaý mindeti tur. Zań jobasyn Parlament qabyldaityn bolsa, ony iske asyramyz», - dedi ministr tilshiler saýalyna jaýap bere otyryp.
Budan bólek, ministr pedagogtardyń mártebesine bailanysty zań jobasynda biraz máseleler qarastyrylǵanyn atap ótti.
Eske sala keteiik, jaqynda QR Bilim jáne ǵylym ministri Ashat Aimaǵambetov áleýmettik jelide taraǵan kókshetaýlyq muǵalimniń daýly suhbaty jóninde pikir bildirgen edi.
«Dostar! Sońǵy kúnderi tarih pániniń muǵalimi A.K.Ahetovanyń videosuhbaty keńinen taralyp jatyr. Atalǵan rolikte kóterilgen máseleler qoǵam tarapynan qyzý talqylanýda. Dál qazir bul materialdyń mazmunyna qatysty eshqandai baǵa bermeimin. Eń bastysy, kez kelgen muǵalim men ata-ana óz pikirin ashyq bildirýge quqyly ekenin túsiný - mańyzdy, al bizdiń mindetimiz - osy usynystar men eskertýlerdi nazarǵa alý», - dep jazdy ministr Feisbýk jelisindegi resmi paraqshasynda.
