Sanitarlyq-epidemiologiialyq baqylaý komitetiniń tóraǵasy Aijan Esmaǵambetova Ashyq júiesin mektep pen balabaqshalarǵa engizý múmkindigi týraly pikir bildirdi, dep habarlaidy "Ult aqparat".
«Qazir balalardy qyrkúiekten bastap offlain rejimde oqytý máselesi pysyqtalyp jatyr. Árine, mektepte bilim alatyn balalardyń sany qazir aitarlyqtai kóp – 3 millionnan asady. Biz de balalardyń mektepten úiine virýs aparý nemese úiinen mektepke virýs alyp kelý qateri bar ekeninen qaýiptenip otyrmyz. Sondyqtan mektepterge, mektepke deiingi bilim uiymdaryna, joǵary oqý oryndary men arnaiy bilim beretin oryndarǵa Ashyq júiesin mindettep engizý máselesi qarastyrylyp jatyr. Biraq naqty bir sheshim joq», - dedi komitet tóraǵasy.
Sondai-aq, ol bilim oshaqtaryna Ashyq júiesin engizgen kúnniń ózinde smartfon alyp júrýdiń qajet bolmaitynyn túsindirdi.
«Búginde biz muǵalimderge mindetti talap qoiyp otyrmyz. Meditsinalyq qarsy kórsetilimi joq muǵalimderdiń bári oflain rejimde jumys isteýi úshin ekpe alýy kerek. Bul balalardyń qaýipsizdigi úshin qajet bolǵandyqtan, mindetti talap. Sonymen qatar, bas sanitar dárigerdiń qaýlysy boiynsha Ashyq júiesiniń aiasynda smartfony joqtar JSN-in kórsetý arqyly statýsty anyqtaý múmkindigi bar», - dedi Sanitarlyq-epidemiologiialyq baqylaý komitetiniń tóraǵasy.
Sonymen qatar ol Ashyq júiesine qatysatyn nysandarǵa balalardyń kirý tártibin túsindirdi.
Onyń aitýynsha, 12 jasqa deiingi balalar qoǵamdyq oryndarǵa kóp jaǵdaida ata-anasymen birge barady.
«Ashyq júiesine engen nysandarǵa 12 jasqa tolmaǵan balalar ata-anasynyń jeteginsiz kóp bara bermeidi. Al ata-analarynyń «qaýipsiz» statýsy bolsa, balalary da erkin kire alady. Al atalmysh nysandarǵa ata-anasynsyz baratyn, 12-den asqan balalar úshin erikti PTR test júiesi bar. Biznes nysandarynyń ózderi balalardyń Ashyq júiesindegi statýsyn anyqtaý týraly mindetti talap qoiyp jatqan jaittar bar. Sondyqtan 12 jasqa deiingi balalardan Ashyq júiesinde statýsyn anyqtaý talap etilmeidi. Odan úlken balalar eriktilik aiasynda iske asady», - dedi komitet basshysy.
Onyń aitýynsha, sońǵy kezde balalar koronavirýspen burynǵydan jii aýyratyn bolǵan. Degenmen, bul olardy ata-analarynyń kelisiminsiz vaktsinalaýǵa negiz bola almaidy.
«Balalardyń quqyqtary týraly zań boiynsha balalarmen qatysty dúnieniń bári ata-ananyń ruqsatymen jasalýy kerek. Iaǵni, 18-ge deiingi balalardyń ata-analarynan nemese ókilderinen kelisim alý mindetti. Sondyqtan osyndai tártip boiynsha jumys istep jatyrmyz», - dedi Aijan Esmaǵambetova.
