Qazaqstandaǵy salalyq bilim jáne ǵylym qyzmetkerleri kásipodaǵy men onyń múshelik uiymdary respýblikamyzdyń bilim berý uiymdarynda jumys isteitin ustazdarǵa myńǵa jýyq noýtbýk qurylǵysyn tabystady. Bul týraly "Ult aqparat" Salalyq kásipodaqtyń baspasóz qyzmetine silteme jasap habarlaidy.
«Qashyqtan bilim berý protsesin tiisti deńgeide uiymdastyrýǵa úles qosý maqsatynda «Qazaqstandaǵy salalyq bilim jáne ǵylym qyzmetkerleri kásiptik odaǵy» qoǵamdyq birlestigi pedagogtardy qoldaý týraly sheshim qabyldaǵan bolatyn. Osy jumystardyń aiasynda jańa oqý jyly qarsańynda sala qyzmetkerleri – kásipodaq múshelerine jan-jaqty kómek kórsetý sharalary júzege asyryldy. Tek Jambyl oblysynda 336 birlik noýtbýk aimaqtaǵy bilim berý uiymdarynyń balansyna berilse, qalǵan óńirlerde noýtbýk qurylǵylary sala qyzmetkerleri - kásipodaq múshelerine qaitarymsyz negizde syiǵa tartyldy», - delingen baspasóz baianynda.
Atap óterlik jait, noýtbýkter kópbalaly, az qamtylǵan ustazdarǵa, muqtaj pedagogtarǵa, sonymen qatar otbasynda mektep jasynda jáne stýdent birneshe balasy bar kásipodaq múshelerine berilgen. Budan bólek, birqatar oblystarda ustazdarǵa noýtbýk satyp alýy úshin qarjylai kómektesti. Al keibir aimaqtarda kásipodaq internet bailanysynyń ótemaqysyn tólep berýdi qolǵa aldy.
Máselen, Qaraǵandy oblysynda Saran aýdandyq kásipodaq komiteti 39 pedagogtyń, Abai aýdandyq kásipodaq komiteti 50 kásipodaq múshesiniń internet tarifiniń qunyn tóleýge materialdyq kómek berdi. Qazirgi tańda Salalyq kásipodaq pen onyń múshelik uiymdary Respýblikalyq «Mektepke jol» aktsiiasyna belsendi túrde qatysýda. Pandemiia kezeńinde kásipodaq múshelerin áleýmettik qoldaý jáne quqyqtyq qorǵaý jumystary jalǵasady.
