Bilim berý júiesindegi tárbie jumystarynyń tujyrymdamasy ázirlenedi. Bul týraly QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Bilim berý protsesindegi eń bastysy – bul tárbie. Bul jaiynda biz birneshe ret aittyq. Tiimdi bilim berý ziiatkerlik sapaǵa tárbieleý, aqparat ala bilý jáne onymen jumys isteý arqyly ǵana júrgiziledi, - dedi Úkimet basshysynyń orynbasary Bilim jáne ǵylym ministrliginiń keńeitilgen alqa otyrysynda.
Onyń atap ótýinshe, bilim berý júiesi rýhani bai, adamgershiligi mol, ziiatker, shyǵarmashyl tulǵalardy daiyndaýy tiis. Bul baǵytta óte kúrdeli suraqtar turǵanyn jaqsy bilemiz. Sondyqtan osy máselelerdiń bárin tárbie júiesine taldaý jasalyp, shuǵyl ári júieli is-sharalar qabyldaýymyz kerek. Men bul jóninde arnaiy keńes ótkizip, tárbie jumystary jóninde tujyrymdama ázirleýdi tapsyrǵan bolatynmyn. Tujyrymdamada mektepke deiingi uiymdardaǵy, mekteptegi, kolledjdegi jáne joǵary oqý oryndaryndaǵy tárbie jumystary tolyq qamtylatyn bolady. Tujyrymdamada jastardy eńbekke baýlý,sportqa, shyǵarmashylyqqa baýlý basym baǵyttar bolýy tiis», - dedi Eraly Toǵjanov.
Osy rette Premer-Ministrdiń orynbasary tujyrymdamany Úkimettiń 2022 jylǵa arnalǵan is-qimyl josparyna engizý qajettigin aityp, birinshi vitse-ministr Sholpan Karinovaǵa kelesi aptada júrgizilip jatqan jumystar jaily baiandaýdy tapsyrdy.
