Qazaqstandyqtar memlekettik bilim berý jinaqtaý júiesi boiynsha 16 myńnan astam bilim berý depozitterin ashty. Bul týraly BǴM habarlady.
Búgingi tańda bilim berý jinaqtaý salymdarynyń jalpy somasy 22,3 mlrd teńgeni quraidy.
Buǵan deiin qazaqstandyqtar ózderiniń nemese balalarynyń bilim alýyna aqshalai qarajat jinaqtaýy úshin «AQYL» bilim berý jinaqtaý salymdary quryldy.
Osy jinaqtaýshy salym júiesin qoldaýdyń basty artyqshylyǵy 9%-ǵa deiingi banktik syiaqydan basqa, qazaqstandyqtardyń salymdaryna memlekettik syilyqaqy esepteledi. Bul artyqshylyq halyqtyń áleýmettik osal toptary úshin de qarastyrylǵan.
«Memleket syilyqaqynyń jyldyq mólsheri 5%-dy, halyqtyń áleýmettik osal toptary úshin jinaqtalǵan somanyń 7%-yn quraidy. Bul rette banktik syiaqy men memlekettiń syilyqaqysy kapitaldandyrylady, iaǵni negizgi salymǵa qosylady. «AQYL» bilim berý jinaqtaý salymdary depozittik naryqta eń joǵary kiriske ie ekenin aita ketken jón. Osylaisha, memleket ata-analarǵa balany oqytýǵa ketetin shyǵyndardy jáne otbasylyq biýdjetke túsetin júktemeni edáýir azaitýǵa kómektesedi», – dep habarlady QR BǴM.
Budan basqa, bilim berý depoziti Qazaqstannyń depozitterge kepildik berý qorymen saqtandyrylǵan jáne memleket pen úshinshi tulǵalar tarapynan da kez kelgen shekteýler men óndirip alýlardan qorǵalǵan. Bul memlekettik bilim berý jinaqtaý júiesi sheńberinde ashylǵan depozitke tyiym sala almaityndyǵyn bildiredi.
«Depozitti memlekettik bilim berý jinaqtaý júiesiniń seriktes bankterinde ashýǵa bolady. Salymshy otbasylyq biýdjettiń múmkindikteri men júktemesine bailanysty salymdy tolyqtyrýdyń mólsheri men júieliligin ózi anyqtaidy. Bilim berý depozitin kassalar, internet-banking, sondai-aq kartadan jinaqtaýshy shotqa aýdarý arqyly tolyqtyrýǵa bolady. Bul salymshylardyń ýaqytyn aitarlyqtai únemdeidi», – dep naqtylady ministrlikte.
Bala grantqa túsken jaǵdaida salymshy barlyq qarajatty bank syiaqysymen jáne memleket syilyqaqysymen birge shottan alýǵa quqyly. Sondai-aq ol qarajatty úshinshi tulǵanyń bilim berý salymyna aýdara alady nemese magistratýra boiynsha oqýyn tóleý úshin jinaýdy jalǵastyrýyna bolady.
Memlekettik bilim berý jinaqtaý júiesi aiasynda oqytý geografiiasyna bailanysty shekteýler joq. Iaǵni, jinaqtardy qazaqstandyq kolledjder men joǵary oqý oryndarynda, sondai-aq shetelde oqý aqysyn tóleý úshin de paidalanýǵa bolady. Tehnikalyq, joǵary jáne joǵary oqý ornynan keiingi bilim alýǵa «AQYL» bilim berý depozitin jasyna qaramastan barlyq qazaqstandyq asha alady.
