Balabaqshalarǵa, mektepterge, kolledjderge jáne joǵary oqý oryndaryna qabyldaý úshin qujat tapsyrý jeńildetildi, dep habarlaidy "Ult aqparat" QR Bilim jáne ǵylym ministri Ashat Aimaǵambetovke silteme jasap.
«Elimizdegi memlekettik qyzmettiń basym bóligi bilim berý salasynda kórsetiledi. Ásirese, balabaqshalarǵa, mektepterge, kolledjderge jáne joǵary oqý oryndaryna qabyldaý qyzmeti – úlken suranysqa ie.
Bilim berý uiymdaryna qujat tapsyrý úshin biraz ýaqyt jumsaý qajet bolatyn. Ol úshin kóptegen anyqtamalardy jinap, basqa memlekettik organdardan qujattardy alyp, olardy aparyp berý syndy birqatar kezeńderden ótý qajet edi. Mundai protsess óte yńǵaisyz ekeni túsinikti.
Biz bul jaǵdaidy ózgertip jatyrmyz», dep jazdy Ashat Aimaǵambetov Facebook-tegi paraqshasynda.
Ministrdiń aitýynsha, balabaqshalarǵa, mektepterge, kolledjder men joǵary oqý oryndaryna qabyldaý protsesin avtomattandyrý, qaǵazbastylyq deńgeiin kúrt tómendetý, jalpy qabyldaý talaptaryn jeńildetý jumystary qolǵa alynǵan.
Mektepke deiingi bilim berý uiymdary boiynsha
Biyl biz balalardy balabaqshalarǵa qabyldaý erejelerine ózgerister engizdik. Endi ata-analar kezekke qoiý qyzmetin tek bilim berý bóliminiń keńsesi arqyly ǵana emes, sondai-aq óz betimen «Azamattarǵa arnalǵan úkimet» bólimderi nemese «Elektrondyq úkimet» veb-portaly arqyly júzege asyra alady. Bul rette kóptegen qujattardy jan-jaqtan jinaý qajet bolmaidy.
Alǵash ret balabaqshalarǵa kezekte tirkelgender arasynda basymdyq eń aldymen pedagogterdiń balalaryna jáne múgedek balasy bar otbasylardyń búldirshinderine beriledi.
Egiz balalary, úshemderi bar otbasylar balalaryn bir balabaqshaǵa berý boiynsha qiyndyqtarǵa tap bolatyn. Endi mundai ata-analardyń bir balasyna belgili bir balabaqshadan oryn tigen jaǵdaida, barlyq balalary da (eger taǵy oryn bolca) sol balabaqshaǵa joldama alady.
Sonymen qatar, mektepke deiingi uiymdardaǵy bos oryndardy bólý protsesi júiege keltirildi. Eger buǵan deiin arnaiy sanattaǵy balalar qabyldanǵannan keiin, úsh kún ótken soń, kezekte turǵandardyń barlyǵyna birdei jańa oryndardy alý múmkindigi ashylsa (mundaida kezektiń máni joiylatyn), endi oryndar kezekte turǵan kelesi birinshi 1 000 (bir myń) ótinish berýshige ashylatyn bolady.
Mektepke qabyldaý boiynsha
Kelesi jyldan bastap birinshi synyp oqýshylarynyń qujattaryn qabyldaý maýsymnan bastap emes, odan erterek – birinshi sáýir men birinshi tamyz aralyǵyna deiin jalǵasady.
Mundai ózgerister ne úshin qajet? Birinshiden, bul – ata-analar úshin yńǵaily. Olar mektepti aldyn-ala anyqtap, oqýǵa túsý úshin qajetti qujattaryn mektep ujymy nemese ózderi eńbek demalysynda bolǵan ýaqytta emes, odan erterek tapsyra alady.
Sonymen qatar, jaz boiy ata-analar qajetti oqý quraldaryn jinaqtap, tiisti jumystardy júrgizip, balalaryn mektepke daiyndaýy kerek. Ata-analar qujattardy jinaýǵa, mektepti anyqtaýǵa úlgermeitinderin aityp shaǵymdanatyn, sondyqtan qujattardy ótkizý protsesi kóbinese 31 tamyzǵa deiin, kei jerlerde tipti qyrkúiektiń ortasyna deiin sozylatyn.
Mektep ákimshiliginiń kózqarasy boiynsha, bul ózgerister protsesterdi ońailatady jáne mektep qyzmetin josparlaýdy áldeqaida yńǵaily etedi. Iaǵni, mektep basshylyǵy synyptardy aldyn-ala toltyra alady, oqýlyqtardyń qajetti sanymen aldyn ala qamtamasyz etiledi jáne olardy ýaqytynda jetkizedi, saǵattardy bóledi, synyptardyń sanyna bailanysty pedagogterdi qabyldai alady. Jalpy, oqý jylynyń bastalýyna tiimdi daiyndalýǵa múmkindik týady.
Endi ata-analar balalarynyń mektepke barýyn aldyn ala josparlap, naqty bilim berý uiymyn anyqtaýy qajet jáne kerek qujattardy ýaqytynda tapsyrýdy, jiberýdi úirenýi mańyzdy.
Esterińizge sala ketsem, endi osy úderisterdiń barlyǵy tolyǵymen avtomattandyrylady jáne «Elektrondyq úkimet» arqyly qoljetimdi bolady. Jai ǵana úide otyryp, ýaqyt pen basqa da resýrstardy shyǵyndamai-aq portal arqyly 1-synypqa qabyldaý týraly ótinish berýge bolady.
Oqýshylardy bir mektepten ekinshisine aýystyrý da jańa formatta júrgiziledi, ol protsess te avtomattandyrylady.
Iaǵni, ata-analarǵa bir mektepten ekinshi mektepke barýdyń qajeti bolmaidy jáne qaǵaz túrinde qujattardy tapsyrýdyń, eski mektepten ketý túbirtegin, odan keiin kelý túbirtegin resimdeýdiń qajeti joq. Mundai eskirgen, ýaqyt jáne qarjy shyǵynyn talap etetin rásimdeý protsesimen kóbisi «kezikti» dep oilaimyn. Bul ózgerister ata-analar men mektep úshin ýaqytty únemdeýge múmkindik beredi. Biz bul jumysty jaqyn arada aiaqtaimyz.
Aita keterligi, biyldan bastap kolledjder men joǵary oqý oryndaryna qabyldaý avtomattandyrylǵan rejimde qoljetimdi.
«Ótken jyly men ata-analarǵa atalǵan jumys 2020 jyly aiaqtalady dep ýáde bergenmin. Endi balalarǵa qujattardy qaǵaz túrinde tapsyrýdyń qajeti joq, árbir bolashaq stýdent ózi úshin tańdaǵan kolledjdiń jáne JOO-nyń saittary nemese «Elektrondyq úkimet» portaly arqyly qujattaryn tapsyra alady. Qujat tigetin papkalardy, konvertterdi satyp alý, qaǵaz anyqtamalardy tapsyrý, tań atpastan joǵary oqý oryndary men kolledjderdiń qabyldaý komissiialarynda kezekte turý nemese basqa eldi mekenge barýdyń qajeti joq. Munyń bári endi ońai jáne yńǵaily bolady, saitqa kirip, bir tetikti basý arqyly barlyq qujattardy jiberýge bolady.
Jalpy memlekettik qyzmetter boiynsha biz biznes-protsesterdi, rásimderdi barynsha avtomattandyryp jatyrmyz. Bul protsester halyqqa barynsha yńǵaily bolýy qajet», dep jazdy Ashat Aimaǵambetov.
