Úkimettik emes sektormen ózara is-qimyl salasynda Qazaqstan Táýelsizdiginiń 30 jyldyǵynyń eń iri oqiǵasy: "Qoǵam men memlekettiń turaqty damýy múddesindegi áriptestiktiń 30 jyly" taqyrybymen Qazaqstannyń X Azamattyq forýmy bastaldy.
Forýmdy Aqparat jáne qoǵamdyq damý ministri Aida Balaeva, Qazaqstannyń Azamattyq Aliansynyń prezidenti Baný Nurǵazieva ashty, dep habarlaidy "Ult aqparat".
Ministr óz sózinde X Azamattyq forýmnyń jumysy Qazaqstan Táýelsizdiginiń 30 jyldyǵynyń qorytyndylaryna arnalǵan mańyzdy oqiǵa ekenin atap ótti. Táýelsizdik tańynda Qazaqstannyń azamattyq sektory ondaǵan ÚEU-dan bastalǵanyn eske sala tura, A.Balaeva búginde elimizdiń bul salasy Ortalyq Aziiadaǵy eń damyǵan qoǵamdyq institýtqa ainalǵanyn aitty. Máselen, jyl saiyn qazaqstandyq "úshinshi sektordyń" qatary orta eseppen 150 jańa qatysýshyǵa qosylyp keledi.
"Azamattyq forým - bul keibireýler dáieksiz aitatyndai "ÚEU ókilderiniń deklarativti-hattamalyq jiyny" emes, al qoldanbaly ideialar men bastamalar týyndaityn, ministrler men ákimder azamattyq belsendilermen teń dárejede birlesken is — qimyl josparlaryn jasaityn, jekelegen áleýmettik problemalardy sheshýge memleket ÚEU-dy tartatyn naqty jumys protsesi", - dedi ministr.
Aita keteiik, X Azamattyq forým jumysyna tuńǵysh ret Qazaqstannyń EQYU, BUUDB, IýNISEF, Fridrih Ebert qory, IýNESKO, IýSAID siiaqty halyqaralyq seriktesteri qatysýda. A.Balaeva olardyń qazaqstandyq azamattyq qoǵamnyń damýyna qosqan eleýli úlesin atap ótti. "Bul missiialarǵa syndarly dialog pen qundy usynystar úshin, ózara túsinistik pen qoldaý úshin, adamgershilik pen ashyqtyq tanytqan úshin alǵys aitqym keledi", — dedi ol.
Óz kezeginde, Qazaqstannyń Azamattyq aliansynyń prezidenti B.Nurǵazieva Azamattyq forým — qoǵamnyń, bilik pen biznestiń syndarly dialogyn quratyn elimizdiń basty alańy ekenin atap ótti. "Búgin Azamattyq Forým jalpyulttyq sipatqa ie boldy.
Ol halyq pen bilik arasyndaǵy keri bailanystyń tiimdi mehanizmine ainaldy. Úkimettik emes sektor naqty qoǵamdyq kúshke qalyptasty dep paiymdaýǵa barlyq negiz bar", - dedi ol.
X Azamattyq forýmnyń jumysy 22-26 qarasha aralyǵynda Nur-Sultan jáne Almaty qalalarynda 5 kún boiy gibridti: onlain da, oflain formatta da ótedi.
Forýmǵa qatysýǵa niet bildirgenderdiń barlyǵy qatysa alady, tikelei efir YouTube jáne Facebook áleýmettik jelilerindege arnaiy resmi paraqshalarynda kún saiyn ótkiziledi, iaǵni óz suraqtaryn qoiyp, jedel túrde keri bailanys ala alady.
ÚEU men qoǵam, memlekettik organdar men kvazimemlekettik sektor, BAQ jáne biznes ókilderiniń arasynan 20 myńnan astam qatysýshyny qamtý josparlanýda.
