Shahmattan álemniń bes dúrkin chempiony Bibisara Asaýbaeva áielder arasynda halyqaralyq dárejedegi grossmeister atandy, dep habarlaidy "Ult aqparat".
Bul ataq qazaq shahmatshysyna FIDE-niń Býdapeshte ótken prezidenttik keńesinde berildi.
«Negizi bul ataqty alý úshin reitingte 2300 upai jinap, 3 birdei pozitsiia boiynsha joǵary kórsetkish normalaryn oryndaý qajet. Bizdiń Bibisara bul kórsetkishti baiaǵyda baǵyndyryp qoiǵan. Tek ony resmi rásimdemegen bolatyn. Onyń maqsaty - halyqaralyq erler grossmeisteri kórsetkishterin oryndaý. Sondyqtan, bul nátijesine buǵan deiin ózi asa mán bermegen. 15 jastaǵy shahmatshydan kúterimiz kóp. Qazir Mańǵystaý oblysynan shyǵyp, Qazaqstan namysyn abyroimen qorǵap júr. Ol sózsiz talanty shahmatshy. Bolashaǵynan budan da úlken jetistikter kútemiz», - deidi shahmattan memlekettik jattyqtyrýshy Dastan Qapaev.
Bibisara Asaýbaevanyń ózi Facebook-tegi paraqshasynda beldi syilyqtyń uiymdastyrýshylaryna alǵys bildirip, marapattaý sharasynan foto jáne videolarmen bólisti.
«Sport salasyndaǵy eńbegi men jetistikteri úshin beriletin «Altyn Mangýst» halyqaralyq syilyǵynyń uiymdastyrýshylaryna sheksiz rizashylyǵymdy bildiremin! Mundai joǵary marapatqa ie bolý men úshin úlken abyroi!», - dedi ol.
