QR BǴM Balalardyń quqyqtaryn qorǵaý komitetiniń bastamasymen mektep dárethanalary men ashanalaryna monitoring júrgizý boiynsha «Balaǵa laiyq» respýblikalyq aktsiiasy bastaldy. Aktsiia «Mekteptiń jaqsarýyna kómektes!» uranymen ótip jatyr, dep habarlaidy "Ult aqparat" ministrliktiń baspasóz qyzmetine silteme jasap.
Aktsiiaǵa kez kelgen niet bildirýshiler qatysa alady: mektep oqýshylary, eriktiler, balalar ókildigi, muǵalimder, ata-analar, úkimettik emes uiymdardyń ókilderi jáne t.b.
Osyndai kraýdsorsing jáne kóptegen múddeli tulǵany tartý arqyly jyly dárethanalary joq jáne balalarǵa sanitarlyq-gigienalyq jaǵdai jasalmaǵan bilim berý uiymdary anyqtalady.
«Mektepterdi qarjylandyrýdyń zańnamalyq fýnktsiialary, olardyń qurylysy men qajetti jaǵdailardy, onyń ishinde sanitarlyq jaǵdaidy jasaý máseleleri ákimdikterdiń quzyrynda ekenin atap ótken jón. Buǵan deiin ministrlik mektep dárethanalary men mektep mázirin jaqsartý boiynsha sharalar qabyldaý úshin birqatar óńirdiń ákimdikterine hat joldaǵan bolatyn. Biz bul máseleni baqylaýda ustaimyz. Aktsiiany ótkizý balalardyń mektepte jaily bolýy úshin jaǵdai durys jasalmaǵan bilim berý uiymdaryn anyqtaýǵa kómektesedi. Monitoring jazalaý úshin emes, mektepterdi birlesip balalarǵa qajetti jaǵdai jasaýǵa tartý úshin júrgiziledi. Mektep ákimshilikterine buzýshylyqtardy joiýǵa ýaqyt beriledi. Sonymen qatar mektep ashanalarynda problemaly jýynatyn bólmeler men zań buzýshylyqtar týraly habarlaǵandardyń aty-jóni jáne olar týraly aqparat jariia etilmeitinine kepildik beriledi. Mektep oqýshylary, muǵalimder, ata-analar da mektep ashanalaryndaǵy baǵanyń kóterilgenin, olardyń mektep mázirine qanshalyqty qanaǵattanatynyn habarlai alady. Odan bólek, qandai ashanalarda ziiandy taǵamdar, iaǵni fastfýd, gazdalǵan sýsyndar satylatyny týraly da málimet bere alady», - dedi QR BǴM Balalardyń quqyqtaryn qorǵaý komiteti tóraǵasynyń orynbasary Elina Paýli.
Naýqan sharttaryna keletin bolsaq, birinshi kezeń «Check your school» dep atalady. Aktsiiaǵa qatysýǵa niet bildirgender 87006990446 nómiri boiynsha WhatsApp pen Telegram-ǵa foto jáne video, sonymen qatar Telegram-daǵy https://t.me/Balagakz_bot arnasy arqyly jibere alady. Sonymen qatar Instagram jáne Tiktok áleýmettik jelileri arqyly #BalaǵaLaiyq #balagalaiyq heshtegi arqyly jýynatyn bólme men ashananyń fotolary men videolaryn jibere alady.
Videonyń uzaqtyǵy 2 minýttan, fotosýret 10 kadrdan aspaýy kerek. Bul rette bilim berý uiymynyń ataýyn jáne onyń mekenjaiyn kórsetý qajet. Osyndai málimetter kórsetilmegen materialdardy jumys toby qarastyrmaidy. Sondai-aq materialdardy mektep ashanalarynda (as bloktarynda), bilim berý uiymdarynyń jýynatyn bólmelerinde talaptardy saqtaý máseleleri týraly jýrnalistik siýjetter túrinde de usynýǵa bolady.
Arnaiy qurylǵan jumys toby kelip túsken materialdardyń jýynatyn bólmeler men ashanalarǵa qoiylatyn talaptarǵa sáikestigin baǵalaidy. Odan keiin fotolar men videolardy buzýshylyqtardy joiý talaptarymen óńirlerdiń Bilim basqarmalaryna joldaidy. «Qateler boiynsha jumys» júrgizilgennen keiin Instagram-daǵy @balaga.laiyq paraqshasynda mektep dárethanalary men ashanalarynyń «deiingi jáne keiingi» fotolary men videolary jariialanady.
«Mektep oqýshylary, muǵalimder, ata-analar jáne basqa da múddeli tulǵalar, mysaly, sanitarlyq jaǵdaidyń joqtyǵy, krandardyń jumys istemeitini, mektep ashanalaryndaǵy sapasyz taǵam jáne t.b. habarlai alady. Barshańyzdy naýqanǵa belsene qatysyp, bilim berý uiymdaryn jaily ári qaýipsiz etýge shaqyramyz. Aita keteiik, aktsiiaǵa qatysýshylar mektep dárethanalary men ashanalarynyń normalaryna sáikes kelmeitinimen qosa, úlgili, iaǵni talapqa sai keletinderiniń de foto jáne videolaryn jibere alady. Aktsiia qorytyndysy boiynsha balalardyń oqýy men mektepte bolýyna qolaily jaǵdai jasalǵan úzdik mektepter marapattalady», - dep túsindirdi QR BǴM Balalardyń quqyqtaryn qorǵaý komiteti tóraǵasynyń orynbasary Elina Paýli.
