Qytai astanasynda koronavirýsqa shaldyqqan sońǵy eki patsient aýrýhanadan shyqty, dep habarlaidy Beijińniń gigiena jáne densaýlyq saqtaý komiteti.
Beijińde koronavirýs epidemiiasy bastalǵannan beri alǵash ret COVID-19 juqtyrǵan birde-bir adam qalǵan joq.
Eske sala ketsek, koronavirýs tarala bastaǵan kezden beri Qytai astanasynda 935 adam COVID-19 juqtyrǵan, sonyń ishinde 335 adam maýsym aiynda «Sinfadi» kóterme bazarynda bolǵan órshýden keiin aýyryp qalǵan.
Qazirgi kezde Beijiń biligi epidemiologiialyq qadaǵalaý sharalaryn álsiretti: endi kóshelerde maska taǵý mindetti emes. Biraq qoǵamdyq kólikter men adamdar kóp jinalatyn jerlerde (saýda ortalyqtary, mádeni jáne oiyn-saýyq mekemeler, memlekettik mekemeler) maska taǵý qajet.
Resmi statistika boiynsha, qurlyqtyq Qytaida indet juqtyrǵan adamdardyń 94 paiyzdan astamy jazylyp shyqqan. 2019 jyldyń jeltoqsan aiynan beri Covid-19 virýsyn 85 myńǵa jýyq adam juqtyrdy. Ólim kórsetkishi 5,45 paiyzdy kórsetip otyr (4,6 myńnan astam adam qaitys boldy). Búkil el boiynsha aýrýhanalarda diagnozy rastalǵan 324 adam jatyr (ótken kúni 31 adam jazylyp shyqty). Tórt patsienttiń jaǵdaiy aýyr.
