2021 jylǵy 1 qańtarda Beijińde COVID-19 virýsyna qarsy vaktsinalaý bastaldy. Birinshi kezekte ekpeni Qytai astanasy halqynyń toǵyz negizgi toby alady, dep habarlaidy QazAqparat.
Qazirgi ýaqytta Beijińde shuǵyl vaktsinalaýdy júrgizetin 8,7 myńnan astam meditsina qyzmetkeri jáne 66 mýnitsipaldyq brigadasy bar 205 ekpe saldyrý pýnkti (statsionarlyq jáne ýaqytsha) ashyldy.
Alǵashqy eki aptada QHR astanasynda vaktsinatsiianyń kúndelikti aýqymy 100 myńnan 150 myń adamǵa deiin jetti. 14 qańtarǵa deiin Beijińde COVID-19 virýsyna qarsy vaktsinasynyń shamamen 1,5 million dozasy egildi.
Vaktsinanyń alǵashqy qabyldaýshylary meditsina, politsiia qyzmetkerleri, órt sóndirýshiler, keden qyzmetkerleri; halyqaralyq jáne ishki qatynastardaǵy kólik salasynyń qyzmetkerleri; tamaq ónimderin óndirý jáne jetkizý salasyndaǵy jumysshylar jáne t.b. boldy.
Beijiń mýnitsipaldy úkimetiniń málimdeýinshe, qytailyq megapoliste vaktsinatsiiany óndirý, jetkizý jáne saqtaý, ony praktikalyq qoldanýdan bastap, janama reaktsiialar men keri bailanysty baqylaýǵa deiin, osy protsestiń tolyq qaýipsizdigi men tiimdiligin qamtamasyz etý úshin ortalyqtandyrylǵan vaktsinatsiiany basqarý júiesi quryldy.
Qytai astanasynyń turǵyndaryn vaktsinatsiialaýǵa qatysatyn meditsinalyq personal «3 tekserý, 7 rastaý jáne 1 anyqtaýdy» qamtityn tehnikalyq nusqaýlyqty qatań ustanady. Úsh tekserý (vaktsina alýshynyń densaýlyq jaǵdaiyn tekserý, allergiialyq reaktsiialardyń syrqatnamasy, sondai-aq vaktsinanyń syrtqy túrin, partiia nómirin, jaramdylyq merzimi men shyǵarylǵan kúnin tekserý), jeti rastaý (vaktsinany alýshynyń aty-jóni men jasyn, vaktsinanyń ataýy, ereksheligi, dozasy, vaktsinanyń engizilý jaǵdaiy men tásilin rastaý) jáne bir anyqtaý (bul meditsina qyzmetkerleriniń vaktsinany alýshyǵa ne onyń qamqorshysyna vaktsinanyń óziniń syrtqy túrin jáne onyń jaramdylyq merzimin kórsetýge mindetti ekenin bildiredi).
QHR astanasynyń turǵyndary men qonaqtarynyń koronavirýsqa qarsy vaktsinatsiia týraly habardarlyǵyn arttyrý maqsatynda Beijiń ákimshiligi Qytaidyń áleýmettik jelilerinde vaktsinalar men olardy qoldaný týraly aqparatty qamtityn jalpyǵa qol jetimdi akkaýnttar qurdy, sondai-aq infektsionist dárigerlermen konsýltatsiialar ótkizý úshin «jedel jeli» ashyldy. Halyqpen vaktsinatsiialaý máseleleri boiynsha túsindirý jumystary sheńberinde gipertoniia, qant diabeti jáne qalqansha bez aýrýlarynan zardap shegetin adamdar tobyna erekshe kóńil bólinedi.
