«Tumar» ulttyq televiziialyq báigesinde «Úzdik áleýmettik joba» nominatsiiasynyń jeńimpazy belgili boldy, dep habarlaidy QazAqparat tilshisi.
«Tumar» báigesin tapsyrý saltanatynda «Úzdik derekti kino» nominatsiiasy boiynsha - «Tak moglo byt» derekti filmin túsirgen «365.Sinema» kinokompaniiasy jeńimpaz atandy. Al «Úzdik televiziialyq serial» nominatsiiasy boiynsha - «Asyl arman» seriialyn túsirgen «Astana» telearnasy úzdikter qatarynan kórindi.
Sonymen qatar, «Úzdik áleýmettik joba» nominatsiiasy boiynsha - «Qareket» baǵdarlamasy top jardy. «Qazaqstan» ulttyq arnasynyń biregei baǵdarlamasyn elimizge belgili telejýrnalist Beisen Quranbek júrgizedi.
«Elordanyń 20 jyldyǵyna orai erekshe báige» nominatsiiasy boiynsha - «Meniń Astanam» jobasy boiynsha «Qazaq TV» telearnasy jeńimpazdardyń qataryn tolyqtyrdy. Jeńimpazǵa syilyqty QR Premer-Ministriniń orynbasary Asqar Jumaǵaliev tabys etti.
Al «Televidenieniń 60 jyldyǵy - televiziiaǵa qosqan úlesi úshin» nominatsiiasy boiynsha - Sovet Masǵutov marapattaldy.
Aita ketsek, Astanada ótip jatqan «Tumar» ulttyq televiziialyq báigesiniń saltanatty rásiminde QR Memlekettik hatshysy Gúlshara Ábdiqalyqova Elbasy Nursultan Nazarbaevtyń quttyqtaýyn oqyp berdi.
Eske sala keteiik, «Tumarǵa» ótinimderdi qabyldaý tolyǵymen avtomattandyrylyp, kaztube.kz portalynyń negizinde júzege asyrylǵan bolatyn. Báigege qatysýshylardyń joǵary belsendilikterin atap ótý kerek. Ótinimderdi qabyldaý kezeńinde kaztube.kz portalyna kirýshiler sany 80%-ǵa ósti, al ótinimder sany byltyrǵy kórsetkishke qaraǵanda 1,6 esege artty (240 ótinim).
2018 jyly «Tumarǵa» 397 konkýrstyq jumys kelip tústi. Olardyń ishinde qazylar alqasy Báige erejesiniń talaptaryna sáikes rásimdelgen 355 konkýrstyq ótinimdi qaraý úshin qabyldady. Aǵymdaǵy jylǵy báigege 14 nominatsiia boiynsha ótinimder qabyldaý 15 qańtar men 1 naýryz aralyǵynda júrgizilgen.
