Eýropalyq quqyq jáne adam quqyqtary institýtynyń direktory Marat Bashimov beibit jiyndar ótkizý úshin arnaiy oryndar belgileýge qatysty oiymen bólisti, dep habarlaidy QazAqparat.
«Qoldanystaǵy zań osydan 25 jyl buryn 1995 jyl qabyldanǵan edi. Ol búginde moraldyq turǵyda eskirdi jáne quqyqtyq normalar qazirgi ýaqytta oryn alyp otyrǵan shynaiy jaǵdaiǵa sáikestendirý qajet. Al búgingi tanystyrylyp jatqan zań jobasy osy olqylyqtardyń ornyn toltyrady», - dedi ol.
Osy rette Marat Bashimov Májiliste tanystyrylyp jatqan «Qazaqstan Respýblikasynda beibit jinalystardy uiymdastyrý jáne ótkizý tártibi týraly» jáne «Qazaqstan Respýblikasynyń keibir zańnamalyq aktilerine beibit jinalystardy uiymdastyrý jáne ótkizý tártibi máseleleri boiynsha ózgerister men tolyqtyrýlar engizý týraly» zań jobalary kóptegen máselelerdi sheshetindigin aitady.
«Arnaýly oryndardy belgileýdi jaqtaýymnyń sebebi osydan 100 jyl buryn kóshelerde mashina bolǵan joq, ýaqyt ózgerdi. Qazir adamdar emin-erkin shyǵyp, bilikke óz talabyn jetkize alady. Erterekte uialy telefondar bolmady. Sondyqtan adamdar ortalyq kóshelerge shyǵyp, talaptaryn qoidy. Biraq, qazir ýaqyt ózgerdi. Adamnan kólik kóp, aqparattyq tehnologiialar damyǵan. Búginde ereýil arqyly adamdarǵa búkil álemde ne bolyp jatqanyn jetkizý túk emes. Al beibit jinalystar ótkizý úshin arnaýly oryn belgileý eń aldymen qaýipsizdik úshin kerek. Arnaýly orynda barlyq infraqurylym bolady», - dedi Marat Bashimov.
Osy rette ol AQSh, Ulybritaniia, Germaniia, Shvetsiia, Japoniia elderinde beibit jiyndardy ótkizý eskertý arqyly júrgizilgenimen kelisý institýty bar ekendigin basa aitty.
«Atalǵan elderdiń zańdarymen bul máseleler rettelgen. Ózge adamdardyń quqyǵy bastalǵan jerde seniń quqyǵyń aiaqtalady. Zań tilimen aitsaq, bul Konstitýtsiianyń 5-bólimi, 12-baby jáne Adam quqyqtary týraly halyqaralyq paktiniń 24-baby. Bul rette mitingide óz quqyǵyńdy júzege asyrý ózgelerdiń quqyǵyn buzbaýy tiis. Mitingige qatyspaityn adam zardap shekpeýi qajet», - dedi Marat Bashimov.
