Qazaqstanda beibit jinalys túrlerine naqty túsinikteme beriledi. Bul týraly QR Aqparat jáne qoǵamdyq damý ministri Dáýren Abaev aitty, dep habarlaidy "Ult aqparat".
«Qoldanystaǵy zańnama kemshilikteriniń biri - beibit jinalystardyń formasyn naqty reglamentteýdiń bolmaýy. Osyǵan orai zań jobasynda uǵymdyq túsinikteme belgileý usynylady. Bul beibit jinalys, jiyn, ereýil, jinalys, sherý syndy negizgi túsinikterdi qalyptastyrýǵa jáne olardyń arasyn jikteýge múmkindik beredi», - dedi Májiliste «Qazaqstan Respýblikasynda beibit jinalystardy uiymdastyrý jáne ótkizý tártibi týraly» jáne «Qazaqstan Respýblikasynyń keibir zańnamalyq aktilerine beibit jinalystardy uiymdastyrý jáne ótkizý tártibi máseleleri boiynsha ózgerister men tolyqtyrýlar engizý týraly» zań jobalaryna tanystyrǵan Dáýren Abaev.
Onyń atap ótýinshe, zańnamada ereýil, jiyn, jinalys túrindegi beibit jinalystardy ótkizý úshin eskertý tártibin engizý josparlanǵan.
«Bul rette jergilikti atqarýshy organdar tarapynan beibit jinalys ótkizýge jaýap bolmaǵan jaǵdaida ol kelisim berý dep sanalady. Degenmen sherý, jiyn túrindegi beibit jinalystardy ótkizý úshin jergilikti atqarýshy organdardan kelisim alý qajet. Sonymen qatar zań jobasynda beibit jinalystar ótkizý úshin balama oryn usyný quqyǵy qarastyrylatyn bolady», - dedi ministr.
