Prezident Qasym-Jomart Toqaev koronavirýstyń jańa tolqyny burynǵylarynan da joiqyn bolyp turǵanyn atady, dep habarlaidy "Ult aqparat" Aqordanyń Twitter-degi paraqshasyna silteme jasap.
«Koronavirýstyń jańa tolqyny joiqyn bolyp otyr. Sońǵy kúnderi júzdegen azamatymyzdan aiyrylyp qaldyq. Ár óńirde aýrýhanaǵa túsken naýqastardyń sany kúrt kóbeidi. Jansaqtaý bólimderiniń barlyǵy iske qosyldy. Qosymsha dári-dármek pen qural-jabdyq satyp alyndy», - dedi Memleket basshysy eldegi sanitarlyq-epidemiologiialyq ahýal jónindegi jumys keńesinde.
Prezident virýs qazaqstandyqtardyń eń názik tustaryna soqqy bolyp tiip jatqanyn atady.
«Bul kúreste bizdiń aǵa býyn zardap shegýde, budan da jamany – balalar indetke shaldyǵýda. Ózińizdi jáne jaqyndaryńyzdy osy qaýipten qorǵaýdyń jalǵyz joly – vaktsinatsiia. Álemdik meditsina ázirge budan basqa ádisterdi usynǵan joq jáne jaqyn bolashaqta usynýy ekitalai», - dedi Qasym-Jomart Toqaev.
Prezidenttiń aitýynsha, vaktsina – bul ózimizdi jáne otbasymyzdy qorǵaýdyń jalǵyz múmkindigi.
«Bizdiń balalar bizdiń qatelikterimiz úshin aqy tólemeýi kerek! Beibit kúnde jaqyndarymyzdy joǵaltpaýymyz kerek. Elimizdiń ár azamatyna aitarym: densaýlyqty saqtańyzdar, týǵan-týystyń, otbasynyń amandyǵyn oilańyzdar! Al, Úkimet pen óńir basshylary belgilengen mindetterdiń bárin minsiz atqarýǵa tiis», - dep túiindedi Memleket basshysy.
