Búgin Májilis depýttarynyń aldyna kelgen qyz bala «111» jedel qyzmeti ózin sýitsidten qalai aman alyp qalǵanyn aityp berdi, dep habarlaidy "Qazaqparat".
Qyz bala depýtattarmen jáne azamattyq sektor ókilderimen kezdesýge arnaiy betperde kiip keldi.
«5 jyl buryn ata-anam qaitys bolyp, meni tátem alyp ketti. Ózge tósekte uiyqtaǵan alǵashqy túni ata-anamnyń endi joq ekendigin túsindim. Oǵan deiin olardy joǵaltýdyń ne ekendigin sezine almaǵan edim. Endi ómir súre almaityn shyǵarmyn dep oiladym. Sebebi ata-anasyz qalai ómir súrýdi bilmedim. Degenmen týǵan-týystarym maǵan jan-jaqty qoldaý kórsetti. Mektepke bardym. Biraq, mektepte jasóspirim problemasy bastaldy. Oqýdy tastadym desem de bolady. Buǵan qosa, synyptastarym syrtymnan ósekteitin. Sonyń saldarynan bári jaman bola tústi. Jalǵyzdyqty bastan keshirdim. Kimge júginerimdi jáne mundai saýalmen bireýlerge júginýge bola ma, bolmai ma ekendigin de bilmedim. Ózime qol jumsaýdy oiladym. Internetten kóptegen aqparat taba alatyndyǵymdy biletinmin. Túrli saittardy, filmderdi kórdim, tipti serialdar, ony qalai jasaý kerektigine qatysty jazbalar, ánder bar», - deidi qyz.
Onyń atap ótýinshe, dál osyndai qiyn sátterde esine mektepke kelgen mamandar aitqan «111» senim telefony túsken.
«Men operatormen bailanysqa shyǵyp, basymdaǵy jaǵdaidy aittym jáne ol psihologpen sóilesýge keńes berdi. Kelistim. Ol meni basqa jelige qosty. Bul jaiynda aitýǵa qatty yńǵaisyzdandym. Sebebi meni kinálaidy, túsinbeidi dep oiladym. Biraq, ol qalai áńgimesý kerektigin bildi. Men onymen uzaq ýaqyt boiy sóilestim, birneshe ret. Ol problemalardy sheshýge, jalǵyz emestigimdi, jaqyn adamdarymnyń bar ekendigin túsinýge kómektesti. Psihologqa terapiiaǵa barýǵa jáne týǵan-týystarymmen sóilesýge keńes berdi», - dep eske aldy ol.
Onyń aitýynsha, psiholog únemi qońyraý shalyp, kóńil-kúiin, densaýlyǵyn bilip turǵan.
«Táttemmen sóilesýge, oǵan aitýǵa bel býdym. Ol meni jeke psihologtyń qabyldaýyna jazdy. Qazir ózimdi birshama jeńil sezinemin. Jalǵyzbyn, ólý kerek, meni eshkim túsinbeidi degen oi qazir joq. Meni túsinedi. Óz problemalarymmen tipti bolmashy bolsa da dostarymmen bólise bastadym. Barlyǵy meni qoldaidy. Jaryq dúniege basqa kózben qarai bastadym. Jaqyn adamdarymnyń bar ekendigin jáne olar meni jalǵyz qaldyrmaityndyǵyn túsinemin. Senim qyzmetine alǵysymdy bildirgim keledi. Olar meni, bir adamnyń ómirin saqtap qaldy», - dedi ol.
