Túrkistan oblysyndaǵy Betpaqdalada Nur-Sultan qalasy men Jambyl oblysynyń turǵyndary 700 keli esirtkimen ustaldy.
Bul týraly oblystyq politsiia departamenti bastyǵynyń orynbasary, politsiia polkovnigi Asyljan Qaldarbekov aitty, dep habarlaidy QazAqparat tilshisi.
Asyljan Qaldarbekovtyń aitýynsha, kúdiktiler «Qarasora-2020» jedel-izdestirý is-sharalary aiasynda Sozaq aýdanynyń aýmaǵynda qolǵa túsken. Túrkistan oblysy PD Esirtki qylmysyna qarsy is-qimyl basqarmasynyń qyzmetkerleri Sozaq APB politseileri jáne jergilikti qoryqshylarmen birge esirtkiniń iri partiiasyn tasymaldaǵan «Toiota Land Krýzer» avtokóligin ustaǵan.
Jedel ýákilder kólikti tintý kezinde ishinen 37 polietilen qapshyǵy men ósimdik tektes esirtki zattary bar birneshe ydystardy tapqan. Saraptama qorytyndysyna sáikes tárkilenip alynǵan esirtki zaty jalpy salmaǵy 650 keliden asatyn «keptirilgen marihýana» jáne 48 kelige jýyq gashish bolyp shyqty.Tergeý barysynda ustalǵan eki kúdiktiniń Nur-Sultan qalasy jáne Jambyl oblysynyń buryn sottalǵan turǵyndary ekeni anyqtaldy. Kúdiktiler esirtki salynǵan qapshyqtar men ydystardy aldyn ala daiyndap, Jambyl oblysynan shyqqany belgili bolǵan. Odan ári olar Sozaq aýdany arqyly jol boiyndaǵy ainalma joldarmen Qostanai oblysyna qarai ketýge árekettengen. Alaida, Betpaqdala aýmaǵynda kólik júrmeitin joldarmen jasyrynyp ketip bara jatqan kólikti qoryqshy baiqap qalyp, politsiiaǵa habarlaǵan.
«Ustalǵan er adamdardy oqiǵanyń barlyq mán-jaiyn anyqtaý úshin Sozaq APB-ne jetkizdi. Atalǵan oqiǵa QR QK 297-baby 3-bóligi «Esirtki quraldaryn, psihotroptyq zattardy, sol tektesterdi ótkizý maqsatynda zańsyz daiyndaý, qaita óńdeý, satyp alý, saqtaý, tasymaldaý, jóneltý nemese ótkizý» boiynsha tirkeldi. Qazirgi tańda kúdiktiler qamaýda». Búgingi kúni Túrkistan oblysynyń politsiia qyzmetkerleri kúdiktiler esirtkiniń iri partiiasyn qandai maqsatpen tasymaldaǵanyn, sondai-aq bizdiń oblysqa esirtki quraldaryn jetkizý arnalaryn anyqtaýda. Sotqa deiingi tergeý amaldary júrgizilýde»,- dedi Asyljan Qaldarbekov.
