Biyl 4 aqpanda astanada jekemenshik úiden shyqqan órt saldarynan bes bala qaza tapqan. Qaza bolǵan bes balanyń ata-anasy Janymgúl jáne Evgenii Siterler jarty jyldan keiin bloger Táńirbergen Berdońǵarovqa suhbat berdi, - dep habarlaidy Tengrinews.kz tilshisi.
Suhbat blogerdiń YouTube arnasynda jaryq kórgen. Evgenii men Janymgúldiń aitýynsha, qazir olar halyq jinap bergen qarajatqa alynǵan eki bólmeli páterde turyp jatyr.
"Halyq kómek retinde meshitke aqsha jinap bergen. Meshit ókilderi jinalǵan qarajatqa bizge páter alyp berdi", - deidi Janymgúl.
Janymgúldiń aitýynsha, oqiǵa bolǵan kúni ekeýi de jumysta bolǵan. Órt saǵat 02:32 shamasynda bolǵandyqtan kórshileri kómektese almaǵan. Sebebi barlyǵy túngi ýaqyt bolǵandyqtan uiyqtap jatqan.
"Maǵan úlken qyzym habarlasyp, "Anashym biz órtenip jatyrmyz" dedi. Men ne isterimdi bilmei birden týystaryma habarlastym", - deidi Janymgúl Siter.
Úige kelgen Janymgúldiń ápkesi balalardyń órtenip jatqanyn habarlaǵan. Úi órtenip jatqan kezde qyzdardyń daýsy da estilmegen. Basynda tek tútin bolǵan. Janymgúldiń týystary terezeni syndyryp, úige kire bastaǵan kezde ǵana órt bastalǵan.
"Eger birden órt bastalǵanda kórshiler baiqaityn edi", - deidi Janymgúl.
Sondai-aq suhbat barysynda qyzdardyń ata-anasy qyzdaryn eske alyp, árqaisyn sipattap berdi. Úlken qyzdary Albina 2006 jyly týylǵan. Ol tórt sińlisine ata-anasy jumysqa ketken kezde bas-kóz bolyp, qarailasyp júrgen eken.
"Albina - meniń kómekshim bolatyn. Balalardy da qarap, sabaqtaryna kómektesip, maǵan qolǵabys jasaityn. Ol aspaz bolǵysy kelgen. Sebebi Albina as ázirleýdi jaqsy kóretin. Qolynan kelmeitin isi joq edi", - deidi Janymgúl.
Janymgúldiń sózinshe, 2008 jylǵy Alina esimdi qyzdarynda epilepsiia bolǵan.
"Alina erke qyz edi. Óziniń barlyq jumysyn ápkesine siltep qoiatyn", - deidi analary.
Janymgúl Siterdiń aitýynsha, úshinshi qyzdary Sabina eń súiikti qyzy bolǵan.
"Ol óz-ózimen júretin qyz edi. Oinasań - oinaidy, oinamasań - renjimeidi. Janyna kelgen adamnyń eshqashan betinen qaqpaityn. Sonymen qatar, ol sýret salýdy óte jaqsy kóretin", - deidi Janymgúl.
Tórtinshi qyzdaryn esine alǵan kezde Janymgúl kózine jas aldy. Sebebi ol óte erekshe bala bolǵan eken.
"Tórtinshi qyzymyz óte sulý bolatyn. Ol Sabinaǵa tiisip, oinaǵandy jaqsy kóretin. Sabina balabaqshaǵa ketken kezde únemi izdep otyratyn", - deidi qyzdardyń anasy.
Evgeniidiń aitýynsha, olar otbasymen órtenip ketken jaldamaly páterde turǵan kezde aiyna shamamen 50-60 myń teńge jumsaityn.
"Oǵan kiim-keshek, mektepke kerekti zattar, azyq-túlik alatynbyz. Biz eshqashan mektepten kómek suraǵan emespiz", - deidi Janymgúl.
Sondai-aq, Siterler otbasy áleýmettik jelilerde qazirgi kúnge deiin ártúrli pikirler oqitynyn aitqan. "Oqiǵa bolǵan kúni nelikten balalardy qaraýsyz qaldyryp ketti?" degen sekildi saýaldarǵa jaýap berdi.
"Qazirdiń ózinde bizge ártúrli pikirler oqimyz. Meniń sol kúni jumysqa shyǵyp ketken sebebim - meni sol kúni túnde jumysqa shaqyryp aldy. Shuǵyl túrde kólik jóndeý kerek boldy. Onyń aldynda ol kóliktiń qosalqy bólshekterin durys qoimaǵan ekenmin. Sebebi maǵan basqa bólshekterdi berip jibergen", - deidi Evgenii.
Janymgúldiń sózinshe, ol balalardyń qaza bolǵanyn birden bilmegen. Ony patrýldik politseilerdiń kóliginde ustap, kúte turýyn suraǵan. Balalardyń qaza bolǵanyn kelesi kúni biraq bilgen.
"Men balalar aman dep oiladym. Tańǵa deiin qazir balalarymdy kóremin ǵoi degen oimen otyrdym. Biraq kúieýim balalardyń qaza bolǵanyn aitty", - deidi Janymgúl.
Janymgúl oqiǵadan keiin alaiaqtardyń paida bolǵanyn aitty. Onyń sózinshe, áldekimder áleýmettik jelide qaza bolǵan balalarǵa arnap jasalyp jatqan eskertkishke aqsha jinaǵan.
"Men týraly jelide "qaitys boldy" dep ne jyndyhanaǵa túsipti degen neshe túrli jalǵan aqparattar júrdi. Onyń barlyǵyn bizdiń jaǵdaiymyzda oqý óte qiyn boldy", - deidi qyzdardyń anasy.
Janymgúldiń aitýynsha, olar aldaǵy tańda balalar úiinen bala asyrap almaqshy niette eken.
"Balanyń jasy bizge mańyzdy emes. Balalar úiinen bala asyrap alǵymyz keledi. Ózimiz de balaly bolǵymyz keledi", - deidi olar.
Sondai-aq Siterler otbasy halyq tarapynan jinalǵan qarajatqa qazir shaǵyn tehnikalyq jóndeý ortalyǵyn ashqan eken.
Aita keteiik, qaiǵyly oqiǵa Nur-Sultan qalasyndaǵy Saryarqa aýdany Shyńǵystaý kóshesinde 4 aqpanda saǵat 02:34-te bolǵan. Ot sóndirý barysynda 2006, 2008, 2013, 2015 jáne 2018 jyldary dúniege kelgen bes balanyń máiiti tabylǵan.
