Berlinde Qazaqstan men Germaniia arasynda ekijaqty saiasi dialog pen saýda-investitsiialyq yntymaqtastyq máselelerine arnalǵan syrtqy ister ministrlikteriniń saiasi konsýltatsiialary ótti, dep habarlaidy "Ult aqparat" QR SIM baspasóz qyzmetine silteme jasap.
Qazaqstan Syrtqy ister ministriniń orynbasary Marǵulan Baimuhan jáne Germaniia Syrtqy ister ministrliginiń Shyǵys Eýropa, Ońtústik Kavkaz jáne Ortalyq Aziia memleketterimen yntymaqtastyq jónindegi ýákili Mihael Zibert jetekshilik etken kelissózder barysynda jyl ishindegi birlesken jumystyń nátijeleri, ásirese Prezident Qasym-Jomart Toqaevtyń 2019 jyldyń jeltoqsanynda jáne 2020 jyldyń aqpanynda Germaniiaǵa jasaǵan saparlary aiasynda qol jetkizilgen kelisimderdiń júzege asyrylýy talqylandy.
Konsýltatsiialar barysynda sondai-aq eki memlekettiń BUU jáne ózge de halyqaralyq uiymdar sheńberindegi yqpaldastyq máseleleri talqylandy. Taraptar jaqynda EQYU-nyń basshylyq laýazymdaryna Qazaqstan men Germaniia úmitkerleriniń taǵaiyndalýy jóninde ózara quttyqtaýlarmen almasty: Qairat Ábdirahmanov Az ulttar isteri jónindegi Joǵary komissar, al Helga Shmid Bas hatshy bolyp sailandy. Suhbattasýshylar sondai-aq Qazaqstan men Eýropalyq Odaq arasyndaǵy keńeitilgen áriptestik pen yntymaqtastyq týraly kelisim men Germaniianyń «Jasyl Ortalyq Aziia» bastamasyn júzege asyrý boiynsha pikir almasty.
COVID-19 pandemiiasyna qaramastan qazaqstandyq jáne german seriktesteriniń tikelei jáne qashyqtyqtan jemisti qarym-qatynas ornatyp jatqanyna qanaǵattanýshylyq bildirilip, Qazaqstan Úkimetiniń german investorlarymen jumys jónindegi Jumys tobynyń, Qazaqstanda turatyn etnikalyq nemister jónindegi úkimetaralyq komissiianyń, saýda-ekonomikalyq yntymaqtastyq jónindegi úkimetaralyq jumys tobynyń, Qazaqstan-German iskerlik keńesiniń jáne Berlin eýraziialyq klýbynyń ekijaqty yntymaqtastyqty damytýǵa qosyp jatqan eleýli úlesi atap ótildi. Mádeni-gýmanitarlyq jáne bilim berý salalaryndaǵy árekettestikti nyǵaitýdyń mańyzdylyǵy qaita qýattaldy.
Kelissózderge qatysqan Qazaqstannyń Germanmiadaǵy Elshisi Dáýren Káripov jáne «Kazakh Invest» UK» AQ Basqarma tóraǵysynyń orynbasary Ǵalym Ózbekov memleketimizdegi investitsiialyq múmkindikter men onyń osy saladaǵy saiasaty týraly baiandady.
Konsýltatsiialar qorytyndysymen taraptar ekijaqty yntymaqtastyqtyń kóptegen salalary boiynsha qyzmetti jalǵastyrýǵa ýaǵdalasty.
Sondai-aq Berlinde M. Baimuhan Resei, Ortalyq Aziia elderi jáne «Shyǵys seriktestikpen» qoǵamaralyq yntymaqtastyq jónindegi Germaniia úkimetiniń Úilestirýshisi, Býndestag depýtaty Iohann Zaathoffpen kezdesti. Suhbattasýshylar Qazaqstanda jáne Germaniiada ótetin aldaǵy is-sharalar kúntizbesin, onyń ishinde 2021 jyldyń 10 qańtaryndaǵy Parlament Májilisi depýtattaryn sailaýy jáne 26 qyrkúiegindegi Germaniiadaǵy federaldyq sailaýǵa daiyndyq taqyryptaryn da qozǵady.
Otandyq diplomat elimizdegi aýqymdy saiasi jáne demokratiialyq reformalardyń, sondai-aq «halyq únine qulaq asatyn memleket» tujyrymdamasynyń júzege asyrylýynyń barysy jóninde maǵlumat berdi. Óz kezeginde I. Zaathoff Qazaqstandaǵy demokratiialandyrýǵa baǵyttalǵan ózgeristerge jáne partiialar arasyndaǵy saiasi básekelestiktiń artýyna jáne Májilistiń jańartylǵan quramymen jemisti qarym-qatynasty jalǵastyrýǵa shynaiy qyzyǵýshylyǵyn bildirdi.
