Reseidiń Germaniiadaǵy elshiligi.
Berlinde Reseidiń Germaniiadaǵy elshiliginiń ekinshi hatshysy belgisiz jaǵdaida qaza boldy, dep habarlaidy Azattyq.
Bul jóninde juma kúni Spiegel basylymy habarlady. Ondaǵy aqparatqa sáikes, politsiia 35 jastaǵy er adamnyń denesin 19 qazanda tańerteń dipmissiia ǵimaratynyń aldyndaǵy trotýardan tapqan.
Boljam boiynsha, ol joǵary qabattan qulaǵan bolýy múmkin. Spiegel-diń jazýynsha, diplomattyń máiiti Reseige tapsyrylǵan. Resei elshiligi "etikaǵa bailanysty" "qaiǵyly oqiǵaǵa" túsinikteme bermedi.
Marqumnyń diplomatiialyq mártebesi bolǵandyqtan nemis prokýratýrasy tergeý júrgize almaǵan. Máiitke saraptama júrgizýge Resei taraby ruqsat bermegen.
Diplomattardyń resmi tizimine súiengen Spiegel marqum Berlindegi elshilikte 2019 jyldyń jazynan beri akkreditatsiiada bolǵanyn jazady. Germaniia qaýipsizdik qyzmeti ol FSB (Resei qaýipsizdik qyzmeti) men arnaiy qyzmetke astyrtyn jumys istedi degen boljamdy teristemeidi.
The Insider jáne Bellingcat basylymdary ashyq derekkózderin saraptai otyryp, marqumnyń aty-jónin Kirill Jalo ekenin anyqtaǵan. Ol – konstitýtsiialyq qurylymdy qorǵaý jáne terrorizmmen kúres jónindegi basqarma (ekinshi FSB) jetekshisiniń orynbasary, general-leitenant Aleksei Jalonyń uly.
Spiegel, The Insider, Bellingcat jáne CNN júrgizgen jýrnalistik zertteýge sáikes, atalǵan basqarmanyń oppozitsiialyq saiasatker Aleksei Navalnyidyń ýlanýyna qatysy bar. Resei biligi muny joqqa shyǵarady.
Batys elderiniń arnaiy qyzmeti ekinshi FSB-ny 2019 jyly tamyz aiynda Berlin saiabaǵynda qaza bolǵan burynǵy sheshen qolbasshysy Zelimhan Hangoshvilidiń ólimimen bailanystyrady. Buryn Resei qorǵanys ministrliginiń Venadaǵy turaqty ókildiginde úshinshi hatshy qyzmetin atqarǵan Kirill Jalo Reseidiń Germaniiadaǵy elshilikte sol oqiǵaǵa deiin eki ai buryn akkreditatsiiadan ótken. Degenmen Jalonyń aýysýy kezdeisoq bolýy da múmkin dep topshylaidy The Insider basylymy.
