Berlin qalasynda qazaq ádebieti men mádenietiniń halyqaralyq forýmy ótti. Astananyń 20 jyldyq mereitoiy aiasynda ótkizilgen sharany Mádeniet jáne sport ministrliginiń qoldaýymen Qazaqstan Jazýshylar odaǵy jáne Ulttyq akademiialyq kitaphana uiymdastyrdy.
Basty maqsat – qazaqstandyq mádenietti álemge tanytý, ádebietti damytý, mádeniet pen óner salasyndaǵy kásibi mamandar arasyndaǵy rýhani bailanysty arttyrý, sheteldik áriptestermen tyǵyz shyǵarmashylyq qarym-qatynas ornatý, qoǵamǵa adamgershilik qundylyqtarynyń negizi ádebiet pen mádeniette ekenin jetkizý jáne eń bastysy - eki el arasyndaǵy mádeni bailanysty nyǵaitý.
«Jahandyq álemdegi zamanaýi Qazaqstandyq mádeniet» taqyrybyndaǵy joba osymen úshinshi ret ótkizilip otyr. Otandyq ádebiet pen mádenietti álemdik keńistikke pash etetin osyndai forým buǵan deiin Seýl men Londonda ótkizilgen edi. Bul sharalardyń barlyǵynda da ádebi, mádeni yntymaqtastyq salasyndaǵy sońǵy úrdisterdi túsiný, óner salasyndaǵy mamandardyń ulttyq ideia sheńberindegi kúsh-jigerin biriktirý úshin túrli jumystar atqaryldy.
Joǵary deńgeide ótkizilgen forýmdar shyǵarmashylyq ókilderi men ǵylymi intelligentsiiaǵa úlken serpilis berdi. Berlindegi halyqaralyq jiynǵa da Qazaqstannan jazýshy, aqyn, dramatýrg, ǵalym, zertteýshi, ádebiettanýshy, jýrnalist, sýretshiler qatysty. Olardyń arasynda: Qazaqstan Jazýshylar odaǵynyń tóraǵasy, Qazaqstan memlekettik syilyǵynyń iegeri, aqyn Ulyqbek Esdáýlet, Ulttyq akademiialyq kitaphana basshysy Úmithan Muńalbaeva, «Aiqyn» gazetiniń bas redaktory Nurtóre Júsip, jazýshy, pýblitsist Ǵadilbek Shalahmetov, Qazaqstan Jazýshylar odaǵynyń múshesi, Halyqaralyq aqyndar odaǵynyń múshesi, aqyn, jyrshy-termeshi Baianǵali Álimjanov, balalar jazýshysy, Resei Jazýshylar odaǵynyń múshesi Dariia Túkenqyzy, Q.Qýanyshbaev atyndaǵy qazaq memlekettik akademiialyq mýzykalyq drama teatrynyń kórkemdik jetekshisi Talǵat Temenov, Qazaqstan Jazýshylary Odaǵynyń múshesi, Qazaqstan Respýblikasynyń eńbek sińirgen qairatkeri, jazýshy Sáýle Dosjanova, aitysker aqyn Balǵynbek Imash bar.
Qazaqtyń ádebieti men mádenieti keńinen nasihattalatyn jiynǵa osy elde turatyn qazaqtar da atsalysty.
Forým barysynda qalamger Sáýle Dosjanovanyń «Ógei júrek» kitabynyń nemis tilindegi, Baianǵali Álimjannyń «Dobrojelatelnyi Askar» jáne «Skaz 100-letnego stepniaka» kitaptarynyń tusaýkeseri ótti.
Sondai-aq, «Mádeniet jáne óner» fotokórmesi jáne Berlinniń Ulttyq kitaphanasynda «Qazaqstan ádebieti men mádenietiniń» ortalyǵy ashyldy. Oǵan Prezident Nursultan Nazarbaevtyń álemdik saiasi arenadaǵy orny men rólin baiandaityn kitaptar, sondai-aq otandyq avtorlardyń qazaq, orys jáne aǵylshyn tilderindegi jinaqtary usynyldy.
