QR Ulttyq ulany «Shyǵys» óńirlik qolbasshylyǵy qolbasshysynyń tárbie jónindegi orynbasary Berik Toqtarov Prezident Qasym-Jomart Toqaevtyń «Halyq birligi jáne júieli reformalar – el órkendeýiniń berik negizi» atty halyqqa Joldaýyna qatysty pikir bildirdi, dep habarlaidy QazAqparat.
«Memleket basshysy, Joǵary Bas qolbasshymyz halyqqa arnalǵan kezekti Joldaýyn qazirgi kúrdeli kezeńdi eńserýdiń jańa baǵyttaryna arnady. Álemde beleń alǵan epidemiialyq ahýal elimizdiń barlyq salasyna keri áserin tigizbei qoiǵan joq. Prezident memlekettegi saiasi, áleýmettik-ekonomikalyq turaqtylyq pen jumys oryndaryn ashý jáne halyqtyń tabysyn arttyrý úshin 5 negizgi bastama kóterdi. Aldaǵy 2022 jyldyń 1 qańtarynan bastap elimizdegi eń tómengi jalaqy mólsheri 42 500 teńgeden 60 myń teńgege deiin kóbeietin boldy. Bul 1 mln qazaqstandyqqa tikelei, al eńbek etip júrgen barlyq azamattarǵa janama túrde áser etedi», - dedi Berik Toqtarov.
Onyń aitýynsha, bul áleýmettik qoldaý ulandyqtardy da syrt ainalyp ketken joq. Máselen, 2021-2023 jyldary ofitserlerdiń jalaqysy 70 paiyzǵa, kelisimshart boiynsha qyzmet etetin áskerilerdiń eńbekaqysy 60 paiyzǵa jýyq artady.
«Qazirdiń ózinde ulandyqtardyń ailyq jalaqysy birtindep ósip keledi. Sonymen qatar elimizdegi 13,5 myńnan astam áskeri qyzmetshige turǵyn úi tólemderi berilip turady. 2024 jyldyń sońyna deiin arnaiy jasaq quramyndaǵy kelisimshart boiynsha qyzmet atqaratyn barlyq áskerige ofitser shenin berý josparlanǵan. Iaǵni, bul ofitserlik shenge bailanysty jalaqy mólsheri de ósedi degen sóz. Bul biz úshin mańyzdy áleýmettik qoldaý bolmaq», - dedi polkovnik.
Óz sózinde ol Memleket basshysynyń syrtqy qorǵanysty kúsheitýge erekshe toqtalǵanyn aitty.
«Qasym-Jomart Kemeluly áskeri doktrinamyzdy tolyqtai qaita qarastyrýǵa mindetti ekendigimizdi jetkizdi. Menińshe, bul der kezinde kóterilgen másele. Sebebi, Aýǵanstanda úlken shielenis bolyp jatqany belgili. Ol elmen ortaq shekaramyz bolmaǵanymen, kórshiles elderdegi turaqsyzdyqtyń salqyny bizge de tieri anyq. Sondyqtan Prezidentimiz óz Joldaýynda syrttan tónetin qaýipti modeldeý airyqsha ózekti ekenin aityp, stsenariiler daiyndaǵan jón ekenin aitty. Iaǵni, bul elimizdiń Qarýly kúshterin syrttan keletin qaýip-qaterge daiyn bolýǵa mindetteidi. Óz kezeginde Ulttyq ulannyń óńirlik qolbasshylyqtary men áskeri bólimderinde jaýyngerlik, shtabtyq jattyǵýlar keshendi túrde ótkizilip turady», - dedi Berik Toqtarov.
