Sarap Time sarapshylar klýbynyń «Tarihi sana jáne qoǵamnyń rýhani qaýipsizdigi» taqyrybyndaǵy otyrysynda «Sakraldy Qazaqstan» ǵylymi-zertteý ortalyǵynyń basshysy Berik Ábdiǵaliuly asharshylyq qurbandarynyń tizimin jasaýdy usyndy, dep habarlaidy Ult.kz tilshisi QazAqparat agenttigine silteme jasap.
«31 mamyr - saiasi qýǵyn-súrgin qurbandaryn eske alý kúni degenimizben, keńestik kezeńde túrli jaǵdaida qurban bolǵandardyń barlyǵyn eske alamyz. Atylǵany bar, repressiiaǵa ushyraǵany bar, asharshylyqta qurban bolǵandary bar. Sondyqtan bul kún - aza tutý kúni, eske alý kúni sanalady. Ózderińiz de bilesizder, keńestik zamanda ártúrli saiasat júrgizildi. Sonyń barlyǵynda da "burynǵy tarihyńdy umyttyrý" saiasaty bar edi. Umytyp ta kettik. Sońǵy jyldary asharshylyqty da, qýǵyn-súrgindi de esten shyǵardyq. Iaǵni máńgúrttendirý, óz tarihyn umyttyrý júrgizildi», - dedi ol.
Onyń atap ótýinshe, Táýelsizdik alǵannan keiin asharshylyq pen saiasi qýǵyn-súrgin qurbandaryn eske alýǵa baǵyttalǵan úkimettik deńgeidegi sharalar qolǵa alynyp, túrli sharalar uymdastyryldy, arnaiy kitaptar jaryqqa shyǵaryldy.
«Biraq áli de tarihi sana tolyqqandy qalyptaspaǵan siiaqty. Ásirese, asharshylyqqa bailanysty anyq baiqalady. Óitkeni, ult sol asharshylyqtyń qaiǵy-qasiretin qansha aitsaq ta, áli sezinbeitin sekildi. Máselen, búgingi ýkraindyqtar asharshylyq jyldarynda qurban bolǵandardyń tizimin jasady. Al biz shejiremizdi, ata-babalarymyzdy bilgenimizben áli de otbasymyzdan, áýletimizden kim asharshylyqta qurban bolǵandyǵyn bilmeimiz. Kópshiligimiz bilýge qulshynyp ta júrgen joqpyz. Ókinishke orai ártúrli statistikalarmen oiyn siiaqty. Bir jerde 1,5 mln, bir jerde 2,5 mln, taǵy bir jerde 4 mln deidi. Onyń qaza bolǵany, kóship ketkeni bar degenmen ultymyzdyń jartysy qyryldy deimiz. Biraq, ǵylymi túrde zerttep, tizimin jasap baryp árbiriniń esimin anyqtaýymyz kerek. Máselen, ALJIR mýzeiinde qurban bolǵandardyń aty-jónderi qara tasqa jazylǵan. Sol siiaqty árbir óńirde, árbir aýylda qurban bolǵandardyń tizimin jasaý qajet», - dedi Berik Ábdiǵaliuly.
