Qazaqstannyń quqyq qorǵaý organdary Atyraý oblysynyń burynǵy ákimi Bergei Rysqalievtiń aktivterin izdep jatyr. Bul týraly Bas prokýratýranyń qoǵamdyq múddelerdi qorǵaý qyzmetiniń basshysy Saparbek Nurpeiisov málimdedi, dep habarlaidy Sputnik agenttigi.
"Qylmystyq toptyń (Bergei Rysqaliev basqaratyn) aktivterin izdeý jáne buǵaý salý sharalary júrgizilýde. Sheteldegi 13 million dollarǵa buǵaý salyndy. Olardy tárkileý jumysy júrgizilip jatyr", - dedi Bas prokýratýranyń qoǵamdyq múddelerdi qorǵaý qyzmetiniń basshysy.
Qadaǵalaý organynyń ókili Bergei Rysqaliev oblys ákimi bolǵan kúnnen bastap biýdjet qarajatyn urlaý úshin baýyrymen birge tutas qylmystyq top qurǵanyn eske saldy.
"2006 jyldan bastap 2012 jylǵa deiin olar memleket menshigindegi nysandardy óz adamdaryna júieli túrde tómen baǵamen satqan, áleýmettik nysandardy salý qunyn arttyrǵan, asa iri kólemde para alǵan jáne qylmystyq maqsatta resmi qujattardy qoldan jasaǵan", - dedi OKQ-da Saparbek Nurpeiisov.
Bas prokýratýranyń málimetinshe, urlanǵan aqsha arnaiy qurylǵan jalǵan firmalar arqyly jylystatylyp, shetelge shyǵarylǵan.
"Birneshe uiymdasqan qylmystyq top qurylǵan. Olardyń bireýin Bergei Rysqalievtiń kúieý balasy – Albakasov basqardy. Gazdandyrý, elektrlendirý, sýmen jabdyqtaý nysandarynda, turǵyn úi, kópir ótkelderin, káriz-tazalaý ǵimarattaryn jáne ózge de áleýmettik nysandar salý kezinde biýdjet qarajatyn urlaý olardyń ortaq maqsaty boldy", - dedi ol.
Qazirgi ýaqytta Bas prokýratýra Sybailas jemqorlyqqa qarsy qyzmetpen birlesip Rysqalievterdiń qylmystyq toptaryn qýdalaýdy jalǵastyrýda.
Qadaǵalaý organynyń málimetinshe, sot úkimimen 185 nysan tárkilengen, onyń ishinde 50 páter, 44 jer ýchaskesi jáne bank shottaryndaǵy aqsha bar. Jalpy qazirgi sátte memleketke 44 milliard teńgeden astam shyǵyn óteldi.
