Qazaqstan men Mońǵoliia ǵalymdardy birlesip tarihi zertteýlerge qatysýy kerek. Bul týraly Halyqaralyq Túrki akademiiasynda Altyn Orda memleketiniń 750 jyldyǵyna arnalǵan dóńgelek ústel otyrysynda QR Úkimet basshysynyń orynbasary Berdibek Saparbaev málim etti, dep habarlaidy QazAqparat.
Aita keteiik, bul sharaǵa Monǵoliia Premer-ministriniń orynbasary Ólziisaihany Enhtúvshin, memleket jáne qoǵam qairatkeri Myrzatai Joldasbekov, Mońǵoliianyń Qazaqstandaǵy elshiligi ókilderi, birqatar ǵylymi mekemelerdiń basshylary, ziialy qaýym ókilderi qatysty.
«Tarihty jaqsy jaqsy bilesizder, bizdiń babalarymyz osy Uly dalada týyn tigip, ordalardyń altyn qazyǵyn qaqqan. Biylǵy jáne aldaǵy jyl bizdiń qazaq eli úshin úlken tarihy mańyzdy kezeń bolmaqshy. Memleket basshysy tisti sheshim qabyldap, Úkimetke tapsyrmalar júktedi. Osy oraida Altyn Ordanyń 750 jyldyǵyna erekshe ekpin qoiylǵan. Atap aitqanda, bul baǵytta birqatar is-sharalar uiymdastyrylyp keledi. Ondaǵy maqsatymyz – ózimizdiń ǵalymdardy, mamandardy, sondai-aq kórshiles elderdiń ǵalymdaryn biraz aýqymdy zertteýlerge tartý, qazba jumystaryn júrgizý, ózge memleketterde ǵylymi-tájiribelik konferentsiia ótkizý. Bul turǵyda Altyn Orda memleketiniń tarihyn barsha dúniejúzine keńinen tanytý mindeti qoiylyp otyr», - dedi Saparbaev.
Úkimet basshysynyń orynbasary bul baǵyttaǵy jumystarda Halyqaralyq Túrki akademiiasynyń róli erekshe ekenin atap ótti.
«Bul akademiianyń quryltaishylary retinde bizdiń memleketten basqa ózge de elder enip otyr. Sonymen qatar, baqylaýshy memleketterde bar. Bizdiń tarihymyz ejelden ózara bailanysta jatyr, Mońǵoliiamen alys emespiz. Sondyqtan Enhtúvshin myrza, sizderdi osy akademiiaǵa baqylaýshy bolýǵa shaqaramyn», - dedi B. Saparbaev Mońǵoliia vitse-premerine qarata aitqan sózinde.
Bul turǵyda QR Premer-Ministriniń orynbasary Altyn Ordanyń 750 jyldyǵy aiasynda týrizmdi damytýǵa airyqsha mán berilip otyrǵandyǵyn atap ótti. Osy sharalar aiasynda qajetti jumystar bastalyp ketti.
«Atqarylatyn jumystarǵa Mońǵoliia tarapynyń da qatysýyn usynamyz. Óitkeni tarihi qundylyqtar, eskertkishter sizderdiń elderińizdiń aýmaǵynda kóptep kezdesedi. Bizdiń ǵalymdar Mońǵoliianyń mamandarymen birge jumys isteitin bolsa, ózimizdiń tarihymyzdy álemge keńinen kórsete alamyz», - dedi B. Saparbaev.
Búgingi shara barysynda Altyn Orda tarihyna qatysty birneshe kitaptyń tanystyrylymy ótti. Ziialy qaýym ókilderi Mońǵoliiadan arnaiy kelgen Ólziisaihany Enhtúvshin myrzaǵa shapan jaýyp, qamshy syilady.
Eske sala ketsek, 2019 jyldyń 24 tamyzynda ótken «Ulytaý – 2019» halyqaralyq týristik forýmyna qatysqan Memleket basshysy Qasym-Jomart Toqaev Altyn ordanyń 750 jyldyǵyn merekeleý aiasynda birqatar jumys jasalý kerektigin atap ótken edi.
Prezident Altyn ordanyń negizin qalaǵan Joshy hannyń esimin ulyqtaýdy mindetti túrde qolǵa alýdy usyndy. Onyń aitýynsha, Joshynyń mazary qazaq jerinde turǵanyn búginde elimizdegi jáne sheteldegi jurtshylyqtyń kóbi bile bermeidi.
