Jambyl obylysynyń ákimi Berdibek Saparbaev OKQ alańynda tilshilerdiń «bilik jolynda komandamen júresiz be?» degen suraǵyna jaýap berdi, dep habarlaidy QazAqpara.
«Birinshiden, «komandamen júresiz be?» degen maǵan alǵash ret qoiylyp otyrǵan joq. Qaida jumys istesem de osy suraq maǵan qaita qoiylyp jatady. Bárine aitarym: Qazaqstannyń Konstitýtsiiasyna sáikes, elimizdiń kez kelgen azamaty Qazaqstannyń kez kelgen jerinde eńbek ete alady. Bul bir. Ekinshiden, Erjan Jylqybaev týraly aitar bolsam, Memleket basshysynyń tapsyrmasymen Jambyl oblysynyń burynǵy orynbasary laýazymynan bosatylǵan bolatyn. Al ol áleýmettik máseleler úshin jaýap beretin. Ózińiz biletindei, Erjan Jylqybaev Eńbek jáne halyqty áleýmettik qorǵaý ministriniń orynbasary bolǵan. Sondyqtan bul salany bes saýsaǵyndai biletin azamat kerek boldy», - dedi Jambyl obylysynyń ákimi Ortalyq kommýnikatsiialar qyzmetinde ótken baspasóz máslihatynda.
Berdibek Saparbaev kúsh qurylymdarynyń aimaqtyq basshylaryn, prokýrorlardy, UQK-nyń óńirlik departamentiniń basshylaryn Jambyl oblysynyń ákimi taǵaiyndamaitynyn aitty.
«Dál sol kezdegi (Qordaidaǵy oqiǵa) jaǵdaiǵa bailanysty bálkim, bul isterden habary bar azamattar kerek bolǵan bolar. Aqtóbe oblysynda terror bolǵan kezde dál sol qyzmetkerler sonda jumys istegen. Osyny eskere otyryp, Bas prokýratýra men UQK basshysy ultaralyq qarym-qatynas salasynda qarym-qatynasty qamtamasyz etý úshin Jambyl oblysyna siz aitqan (jýrnalist qoiǵan suraq boiynsha) basshylardy taǵaiyndaǵan bolýy kerek», - dedi ol.
Berdibek Saparbaev jergilikti kadrlardan da óńirlik bilikke mamandar tartylyp jatqanyn aityp ótti. Máselen, ákimniń orynbasary Talǵat Mamaev Jambyl oblysynda týǵan.
Saparbaevtyń aitýynsha ol ortalyq jáne óńirlik deńgeide de qyzmet etken bilikti maman. Apparat basshysy da jergilikti kadrlar qatarynan shyqqan.
«Álbette eń birinshi kezekte biz jergilikti kadrlar jumys istegenin qalaimyz», - dep túidi ákim.
