Aqtóbedegi memlekettik-jeke menshik seriktestik negizinde salynyp jatqan áleýmettik nysandardyń qurylysymen tanysqan Úkimet basshysy Baqytjan Saǵyntaev aqtóbelikterge alǵysyn bildirdi. Tipti, bul istiń bárin jasap jatqan oblys ákimi Berdibek Saparbaev bolsa, onda ony klondaý qajet dep usynys aitty, dep habarlaidy Ult.kz tilshisi QazAqparat agenttigine silteme jasap.
Búgin tústen keiin Úkimet basshysy Baqytjan Saǵyntaev áleýmettik jańǵyrtý baǵdarlamasynyń oryndalýyna arnalǵan jiynǵa qatysty. Kezdesýge aýdan ákimderi men densaýlyq saqtaý, bilim, sport, mádeniet salasynyń basshylary, qyzmetkerleri qatysty. Keshe keshkilik Aqtóbege kelgen Úkimet basshysy qar jaýyp, borandatqan Aqtóbeniń jumystaryna dán riza ekenin jasyrmady.
«Kórgen nársege kóz toiyp otyr. Ótken jyly kelgen bolatynmyn, biyl kóp nárse ózgergen. Elimizdegi ekonomikanyń ósýi, Elbasy bergen tapsyrmalardyń jergilikti jerde durys oryndalýy, halyqtyń ál-aýqatynyń artýy. Osy jumystyń bári atqarylyp jatyr. Berdibek Máshbekulyna, aqtóbelikterge rizashylyǵymdy aitamyn»,- dedi Úkimet basshysy Baqytjan Saǵyntaev.
Aqtóbege kelgen Úkimet basshysy «Symbat» jeke mektebin, «Kózaiym» oftalmologiialyq ortalyǵy, Jedel járdem beketiniń qurylysymen tanysty. Bári memlekettik-jeke menshik seriktestik negizinde iske asyrylyp jatqan joba.
«Aqtóbeniń erekshe aýrasy ma, ol jaǵyn bilmeimin. Bári osy jerge keledi. Elimizdiń basqa oblystary ǵana emes, sheteldik investorlar da keledi. Jedel jerdem beketiniń qurylysyna bardym. Nege tek Aqtóbe oblysynda memlekettik-jeke menshik seriktestik negizinde salynyp jatyr? Barlyq oblys ortalyǵynda dál osyndai jedel járdem beketi bar. Nege olar sheteldik investorlardy qyzyqtyrmaidy? Sheteldikter tek kelip qana qoimai, qurylys júrgizip jatyr. Olar óz qarjysyna jedel járdem beketin salyp jatyr. Eger bul istiń bári Berdibek Máshbekulynyń arqysynda bolsa, onda ony klondaý kerek»,- dedi Premer-Ministr B.Saǵyntaev.
Jiyn kezinde Úkimet basshysy áleýmettik salany erkindikke jiberý qajet ekenin aitty. Básekelestik ortada bul salany damytýǵa bolady. Tipti, úlken senim bar. Sóitip, bilim, meditsina, mádenietke memleket jaýapty degen qasań oidy buzýǵa bolady.
«Aqsha alyp, balabaqsha, aýrýhana salý kerek. Bul jumystyń bárin tek memleket atqaryp keldi. Aqtóbeden kórip otyrmyz, jekeniń ózi-aq salyp beredi. Tipti, memleketten arzanǵa, sapasyn joǵary etip salady. Ol úshin ne isteý kerek? Kásipkerdiń jaǵdaiyn jasaý kerek. Infraqurylymy qymbat. Ony aparyp berý kerek. Memleket esebinen salsa da sol infraqurylym tartylady ǵoi. Jerin tegin berse... Bárin jasaǵannan keiin qurylys ońai bolady. Kásipker memlekettik tapsyrys arqyly paida tabady»,- dedi B. Saǵyntaev.
