12 tamyzda Almatynyń Medeý aýdandyq soty "Bilik ókilin qorlady" jáne "Bilik ókiline kúsh qoldandy" dep aiyptalǵan azamattyq belsendi Ásiia Tólesovaǵa úkim oqydy. Sot eki bap boiynsha da Tólesovany kináli dep tanyp, onyń bas bostandyǵyn shartty túrde bir jyl alty aiǵa shektedi. Buǵan qosa, sot shyǵynyn ótep, jábirlenýshiler qoryna shamamen 20 AEK (55 560 teńge) kóleminde aiyppul tóleýdi mindettedi. Sýdia Shákirov Tólesovany sot zalynan bosatýdy buiyrdy.
"6 tamyzda Tólesovanyń ruqsat etilmegen mitingige qatysqany belgili boldy. Osy ýaqytta politsiia qyzmetkerleri óz mindetin atqaryp, adamdardyń jinalýyna jol bermedi. Tólesova ýchaskelik politsiia qyzmetkeriniń kómekshisine agressiia kórsetip, onyń basy men oń jaq iyǵynan soqqan. Al ekinshi politseidiń bas kiimine qolyn tigizip, úshinshi qyzmetkerdiń oń jaq iyǵynan jáne artynan urǵan. Sondai-aq, politsiia qyzmetkerleriniń ar-namysyna tietin sózder aitqan.
Jazany taǵaiyndaý barysynda men Tólesovanyń birinshi ret qylmystyq jaýapkershilikke tartylyp otyrǵanyn, zardap shegýshiniń aldynda keshirim suraǵanyn, jazany aýyrlatatyn jaǵdailar bolmaǵanyn eskerip, tiisti sheshim shyǵardym", - deidi sýdia.
Qorǵaý taraby úkimmen kelispeitinin, ony apelliatsiiaǵa beretinin aitty.
– Sot úkimimen kelispeimin. Ony apelliatsiiaǵa beremiz. Qalai bolǵanda da Tólesovany aqtaýǵa kúsh salamyz, – dedi advokat Djohar Ótebekov.
Aita keteiik, 11 tamyz kúni ótken jaryssóz kezinde prokýror Tólesovanyń "qoǵamǵa qaýipti qylmystyq áreket jasaǵanyn" aityp, onyń bas bostandyǵyn bir jylǵa aiyrýdy jáne aiyppul tóletýdi suraǵan edi. Al qorǵaý taraby belsendiniń "kinásin dáleldeitin" aiǵaq retinde kórsetilgen videonyń jaramsyz ekenin aityp, ony aqtaýdy suraǵan.
Azamattyq belsendi Ásiia Tólesova Almatyda - 6 maýsymdaǵy mitingiden keiin tutqyndalǵan. Ony narazylyq kezinde "politsiia qyzmetkerine kúsh qoldandy" jáne "qorlady" dep aiyptaǵan. Al belsendiniń ózi áleýmettik jelide miting kezindegi zańsyzdyqtardy kórip turyp shydamai, "emotsiiaǵa berilip, jaýap qaiyrdym" dep túsindirgen. Aldyn ala tyńdaý kezinde belsendiniń advokattary Tólesovanyń qoly politsiia qyzmetkeriniń basyna emes, fýrajkasyna tigenin, olar fizikalyq soqqy almaǵanyn aitqan edi.
Ásiia Tólesova 10 maýsymnan beri qamaýda bolǵan.
