Belgiia aýrýhanalaryna COVID-19 virýsyna shaldyqqan patsientter týraly málimetke sáikes, statsionardaǵy naýqastar qatarynda jastar kóbeigen, oalrdyń kóbiniń artyq salmaǵy bar, dep habarlaidy QazAqparat.
Eldiń jetekshi virýsolog dárigeri Iv Van Letemniń aitýynsha, vaktsinalaý naýqany qarqyndy júrgizilgendikten aýrýhanalarǵa túsken naýqastardyń jasy aitarlyqtai tómendep keledi.
Belgiiada koronavirýstyń «úshinshi tolqyny» bastalǵaly (aqpannyń ortasynan bastap), KVI juqtyrǵan patsientterdiń jartysy - 66 jasqa deiingiler.
«Bul ekinshi tolqyn kezeńine qaraǵanda jeti jas kishi, sondyqtan óte mańyzdy», - deidi I.Letem.
Ol atalǵan úrdisti egde jastaǵy adamdar arasynda vaktsinalaý júrgizilgenimen bailanystyryp otyr. Qazirgi kezde Belgiia aýrýhanalarynda koronavirýs diagnozymen jatqandardyń 31 paiyzy - 45-50 jas aralyǵyndaǵy adamdar. Aýrýhanalarǵa túsip jatqan patsientterdiń 2 paiyzy ǵana qarttar úii nemese mamandandyrylǵan pansionattardan jetkizilgen.
Pandemiianyń «ekinshi tolqynynda» bul kórsetkish 20 paiyz boldy. Budan basqa, qazirgi kezde koronavirýsqa shaldyqqan patsientterde aýrýdyń negizgi patologiiasy az. «Ekinshi tolqyn» kezinde patsientterdiń 50-60 paiyzynda kem degende eki sozylmaly aýrýy bolǵan. «Úshinshi tolqynda» bul kórsetkish patologiiasy bar naýqastardyń 30-50 paiyzynda ǵana. Bul rette mundaǵy ilespe faktor – semizdik.
Belgiialyq virýsolog mamannyń pikirinshe, elde KVI naýqastarynyń qaitys bolýynyń azaiýy aýrýdy jaqsy emdeýdiń arqasynda bolyp otyr. Budan basqa, bul kórsetkish aýrýhanalarǵa kelip túsetin patsientterdiń jasynyń tómendeýine de bailanysty.
«Belgiiadaǵy árbir onynshy patsient COVID-19 virýsymen kúreste áli de jeńilip jatyr. Bul jaǵdai 2020 jyldyń basymen salystyrǵanda jaqsardy, sebebi ol kezde on patsienttiń ishinde ekeýi kóz jumatyn. Alaida ólim-jitim deńgeii áli de joǵary», - dedi I.Letem.
Belgiianyń qarqyndy terapiia bólimderinde áli de patsientterdiń úshten bir bóligi koronavirýstan kóz jumyp jatyr.
Belgiiada el turǵyndarynyń 30 paiyzyna vaktsina salyp úlgerdi. Osyǵan bailanysty el úkimeti karantin shekteýlerin birtindep alyp tastaýǵa kiristi.
