Qazaq prozasyna «Aspanqora», «Shal men jylqy», «Quralaidyń salqyny» siiaqty klassikalyq shyǵarmalardy syilaǵan jazýshy, birqatar basylymda bas redaktor qyzmetin atqarǵan jýrnalist Jumabai Shashtaiuly qaitys boldy.
Qaraly habardy Májilis depýtaty Janarbek Áshimjan jetkizdi.
«Qasietti Orazanyń ekinshi kúni qazaqtyń birtýar qalamgeri, asyl aǵamyz Jumabai Shashtaiuly Jaratqannyń quzyryna qaitypty. Birneshe býynǵa ustaz bolǵan, adal hám tap-taza qalpynan ainymai, sońynan bir aýyz bóten sóz ilestirmegen Jumaǵań týraly aitar jaqsy áńgime kóp. Jaqsylar shetinen ketip jatyr», — dep jazady ol.
Jumabai Shashtaiuly 1950 jyly Jambyl aýdany Jambyl aýylynda dúniege kelgen.
Ol «Kommýnizm joly» gazetinde, 1980-87 jyldary respýblikalyq «Leninshil jas», «Sotsialistik Qazaqstan» gazetterinde, 1987-90 jyldary «Jalyn» jýrnalynda jumys istedi.
1990-92 jyldary «Qazaq tili» qoǵamy Almaty oblystyq komiteti tóraǵasynyń orynbasary, 1992-96 jyldary «Jas Alash», «Qazaq ádebieti» gazetterinde bólim meńgerýshisi, 1996-2002 jyldary halyqaralyq «Zaman-Qazaqstan» gazetiniń bas redaktory boldy.
2002 jyldan Qazaq radiosynyń bas redaktory qyzmetin atqardy. 2008-2017 jyldary «Qazaq ádebieti» gazetinde bas redaktor bolǵan.
«Tań nury» atty ujymdyq jinaqqa «Qiiada» atty alǵashqy povesi endi. 1984 jyly shyqqan «Qyzyl qar» atty tuńǵysh jinaǵy sol kezdegi saiasi basshylyq tarapynan qatal synǵa ilikti. «Jala men nala» (1987 j), «Jyr jolbarys» (1996 j), «Bizdiń zamannyń Aiaz bii» (1997 j), «Jańǵyryq» romany (2004 j), tańdamaly 2 tomdyq jinaǵy (2010 j) jáne «Aiaz bi» romany «Jazýshy» baspasynan qaita basylyp shyqqan (2013 j).
