Qazaqstandyq sáýletshi Baqytjan Áshirbaev kóz jumdy, dep habarlady Qazaqstannyń indýstriia jáne infraqurylymdyq damý ministrliginiń resmi telegram arnasy.
Baqytjan Áshirbaev – Shymkent qalasynyń týmasy. Ol "sáýletshi" mamandyǵy boiynsha joǵary bilim alǵan. Áshirbaev óz ómirin arhitektýra men qala qurylysyna arnady.
Jan-jaqty daryndy azamat barlyq qyzmetinde shyǵarmashylyqty joǵary orynǵa qoiatyn. Sýretke túsirýmen áýestenip, kórmeler uiymdastyratyn. Onyń "Túrkistannyń altyn qabyrǵalary" atty fotolary asa tanymal. Sondai-aq tele jáne kinotúsirilimmen de ainalysty. Bir kezderi stýdiia jasaqtap, jýrnal shyǵarýǵa atsalysty, óleń jazyp, ándi tamasha oryndaityn", - dep jazylǵan habarlamada.
Áshirbaevty kózi tirisinde Shymkent ańyzy dep ataityn.
Ol eńbek jolyn 1975 jyly "Iýjgorselproekt" jobalyq institýtynda sáýletshi qyzmetinde bastaǵan. 1981-1999 jyldary Shymkenttiń bas sáýletshisi boldy. Onyń jetekshilik etýimen qala kórki túbegeili ózgergen.
1999-2005 jyldar aralyǵynda Baqytjan Áshirbaev Túrkistannyń 1500 jyldyq mereitoiyna daiyndalý jáne ótkizý jónindegi direktsiiaǵa jetekshilik etti. Ol osy qyzmeti úshin Qazaqstan memlekettik syilyǵynyń laýreaty atandy.
Sonymen qatar Áshirbaev oblystyń bas sáýletshisi jáne keiinnen qysqartylǵan Ońtústik Qazaqstan oblysy ákiminiń orynbasary qyzmetinde bolǵan.
