Sýret ashyq derekkózden alyndy
Aqyn, Qazaqstannyń eńbek sińirgen qairatkeri Qoishyǵul Jylqyshiev 75 jasqa qaraǵan shaǵynda dúnieden ótti. Bul týraly atyraýlyq aqyn Áliia Dáýletbaeva óziniń Facebook-tegi paraqshasynda jazdy.
"Atyraý mádenietiniń aqtańgeri Qoishyǵul aǵa jalǵannan ótti... Ómir degen osy eken... Betimizden qaqpadyńyz... Erkeligimizdi kóterdińiz... Qamqor boldyńyz... Dúnie shyn jalǵan eken ǵoi... Alla aldyńyzdan jarylǵasyn, aǵa!", - dep jazdy ol áleýmettik jelide.
Qoishyǵul Jylqyshiev 1948 jyly 24 qazanda Atyraý oblysy Inder aýdany Jarsýat aýyldyq keńesine qarasty Jamanqudyq jailaýynda dúniege kelgen. 1975 jyly QazMÝ-dyń jýrnalistika fakýltetin támamdaǵan.
Qazaq KSR Mádeniet ministrliginde, televidenie salasynda qyzmet istegen. Sondai-aq «Ónerpaz» qoǵamdyq qaiyrymdylyq qorynyń jáne respýblikalyq «Mahambet» qorynyń prezidenti bolǵan. Keiingi jyldary Qazaqstan Jazýshylar odaǵy Atyraý oblystyq filialynyń direktory qyzmetin atqardy.
«Tuńǵysh» (1978), «Muń-kitap» (1998), «Asaýker» (2001) siiaqty jyr jinaqtarynyń avtory.
Mahambet Ótemisuly týraly pýblitsistikalyq maqalary úshin Qazaqstan Jýrnalister odaǵynyń Ahmet Baitursynov atyndaǵy syilyǵyn aldy (1996 jyl). Sondai-aq Mahambet atyndaǵy syilyqtyń laýreaty.
