Belarýstiń Glýsk aýdanyndaǵy balalar úiinde múgedektigi bar keminde 13 balaǵa koronavirýs juqqan, 8 qyzmetkerden virýs tabylǵan. Bul týraly balalar úiine qarjylai kómek beretin irlandiialyq qaiyrymdylyq qoryna silteme jasaǵan BBC saity habarlady.
Glýsk aýdany ortalyǵyndaǵy "Vesnovo" balalar úiinde damýynda kinárat bar, immýniteti álsiz shamamen 174 bala jáne jasóspirim turady. Jergilikti bilik 24 sáýirde balalar úiinde virýs taraǵanyn rastaǵanmen qansha adamǵa virýs juqqanyn aitpaǵan.
Ortalyqty qarjylandyratyn irlandiialyq Chernobyl Children International qaiyrymdylyq qorynyń jetekshisi Ade Roshe múgedektigi bar balalardyń densaýlyǵyna qaýip tóngenin aityp, alańdaǵan. Onyń sózine qaraǵanda koronavirýs juqqan keibir balalardyń jaǵdaiy óte aýyr. Ortalyq balalardy qorǵaý úshin shara qoldanyp jatyr, biraq jabyq jaǵdaida ómir súrip jatqandyqtan jaǵdai qiyn.
Mogilev oblysy biliginiń aitýynsha, bastapqyda ortalyqta isteitin bir qyzmetkerden koronavirýs tabylǵan. Izinshe barlyq qyzmetkerler men sonda turatyn balalar, jasóspirimder testen ótken.
Aqparat boiynsha, balalar úiiniń jetekshileri úkimetten kómek surap, balalardy evakýatsiialaýdy ótingen.
Belarýs prezidenti Aleksandr Lýkashenko COVID-19 aýrýyna bailanysty álem elderiniń alańdaýyn mysqyldap, virýs qaýpi týraly aqparatty joqqa shyǵarǵan.
Sońǵy málimet boiynsha, Belarýste 9590 adamnan koronavirýs tabylǵan, 67 adam qaitys bolǵan. 1573 adam jazylǵan.
