2015 jyly «Slavian bazary» halyqaralyq festivaliniń jeńimpazy, qazaq atyn álemge tanytqan Dimash Qudaibergen biyl Vitebskke tóreshi retinde kelip, festival aiasynda án shyrqady, dep habarlaidy QazAqparat tilshisi.
2015 jyly qazaqstandyq ánshini fanattary shat-shadyman shapalaqpen jáne gúl shoqtarymen kútip alǵan bolatyn.
Arada úsh jyl ótkende Belarýske tóreshi retinde joly túsken ánshini jankúierleri sahnadan jibergisi kelmei, ánderdi kóbirek oryndaýyn ótinip, qolqa saldy. «Slavian bazary» festivaliniń júrgizýshisi tipti reseilik ánshi Nikolai Baskovtyń gúl shoqtarynsyz qalǵanyn aityp, ázildedi. Osynyń bárin Belarýs prezidenti Aleksandr Lýkashenko jymiyp qana tamashalap otyrǵan bolatyn.
Festivaldiń ashylý saltanatynda Dimash Qudaibergen «S.O.S. d'un terrien en detresse» ánin oryndady. Sonymen birge, ol «Uly dalanyń óneri» atty gala-kontsertte án shyrqady. Ol «Adagio» ánimen qosa Naǵima Esqalievamen birge «Belovejskaia pýsha» ánin áýeletti.
Óziniń Instagram paraqshasynda qazaq ánshisi Belarýstaǵy jankúierleriniń qalai shyǵaryp salyp jatqanyn kórýge bolady. Fanattarynyń biri ánshige «Biz seni Piterde kútemiz» dep te aityp qaldy. Ánshiniń Instagram paraqshasyna júktelgen shaǵyn videonyń astyna fanattar ystyq yqylasy men tilekterin jaýdyrýda.
«Qymbatty Dimash! Keshegi ániń úshin kóp rahmet! Sizdiń perishte daýysyńyzdy estigenime shyn júrekten qýanyshty ekenimdi jetkize otyryp, ómirimniń eń bir aishyqty sátterin bastan ótkergenimdi atap ótkim keledi. Fanattaryńyzben az ýaqyt kezdesý sizdi sharshatpady degen senimdemiz. Bul biz úshin oryndalǵan arman boldy», - deidi ánshiniń jankúierleriniń biri Tereza Kakol.
