Almaty qalasy sanitariialyq-epidemiologiialyq baqylaý departamentiniń basshysy Jandarbek Bekshin onlain brifing barysynda «delta» shtamyn juqtyrǵan alǵashqy patsienttiń jaǵdaiy týraly aitty, dep habarlaidy "Ult aqparat".
«Úndi shtamy anyqtalǵan alǵashqy patsienttiń jaǵdaiy jaqsy. Ana men bala qanaǵattanarlyq jaǵdaida aýrýhanadan shyǵaryldy. Olar endi úilerinde dárigerlerdiń baqylaýynda bolady. Epidemiologiialyq tekserý júrgizildi. Almatylyq kelinshek úiine jóndeý jumystaryn júrgizgen jáne qaladaǵy birneshe qurylys dúkenderinde bolǵan. Aýrýdy sol jaqtan juqtyryp aldy degen boljam bar» - dedi Jandarbek Bekshin.
Aita keteiik, Almatyda koronavirýs infektsiiasynyń úndi shtamy birinshi bolyp 38 jastaǵy áielden anyqtaldy. Keiinirek onyń segiz jastaǵy balasy da COVID-19-nyń osyndai túrin juqtyrǵany belgili boldy.
