Depýtat Bekbolat Tileýhan Qazaqstan aýmaǵynda sportty damytý úshin nasihat sharalaryn qolǵa alý kerektigin aitty, dep habarlaidy "Ult aqparat".
Búgin Parlament Májilisinde ótken Úkimet saǵatynda elimizde buqaralyq sportty damytý máselesi qaraldy.
«Jalpy, buqaralyq sport degen ne? Bul eń aldymen, halyqtyń densaýlyǵy. Jappai el qimyldasa, sportpen shuǵyldansa, ol halyqtyń densaýlyǵy myqty bolady. Bul salany damytýǵa qarjy kerek dep jatyrmyz, ol túsinikti másele. Biraq ideologiia, nasihattyń mańyzy da kem emes. Mysaly, telearnanyń aqparattyq yqpalynyń orasan nárse ekenin bilemiz ǵoi?! Nasihattyń arqasynda qazir ánshi emes adam qalmady. Daýysynyń bar-joǵy báribir bolyp tur. Buryn daýysy barlar ánshi bolatyn, qazir aýzy barlardyń bári ánshi. Mýzykalyq kýltýrany qatyrdyq, fizicheskii kýltýra ońbai tur», - dep toqtaldy depýtat.
Osy oraida ol sportty nasihattaýǵa airyqsha nazar aýdarý qajettigin atap ótti.
«Qazaq oiyn balasy dep aitady, 13 jasqa deiin onyń ómiriniń negizgi máni oiynda. Júgirgen balanyń densaýlyǵy myqty bolady... Semirip ketken, aýlany eki ainalsa entigip qalatyn balanyń maiyn sylyp, bulshyqetin qalyptastyrý úshin, sondai-aq kompiýter nemese smartfonǵa shuqshiyp qalǵan balany dalaǵa alyp shyǵý úshin buqaralyq sportty jaqsylap nasihattaýymyz kerek ekeni túsinikti. Bul úshin nasihat kerek!», - dedi Bekbolat Tileýhan.
Depýtat elimizde at sportyn damytýǵa erekshe mán berý kerektigin, sondai-aq jumys oryndarynda qyzmetkerlerdiń densaýlyǵyn nyǵaitý jónindegi baǵdarlamany engize otyryp, kásiporyndar men uiymdarda dene shynyqtyrýdy damytý úshin jaǵdai jasaý qajettigin atap ótti.
Budan buryn habarlanǵandai, 2019 jyldyń qorytyndysy boiynsha elimizde dene shynyqtyrý jáne sportpen júieli túrde shuǵyldanatyndar sany 5,7 mln adamǵa jetken. Bul jalpy halyqtyń 30,6 paiyzy.
