Ókilettigi toqtaǵan eks-depýtat Bekbolat Tileýhan Májilis otyrysynda aǵynan jarylyp, áriptesterinen keshirim surady, dep habarlaidy "Ult aqparat".
"Nurlan Zairollauly, asyra maqtap jiberdińiz. Osy maqtaýǵa laiyqty ekenime kúmánim bar. Degenmen aǵalyq nietińizge, áriptestik kóńilińizge shyn júrekten alǵysymdy bildiremin.
Sizdermen jumys istegen sátim – ómirimniń bir belesi, bir kezeńi, baqytty, jaqsy shaǵym.
Áýeli taiymda tanyp, tulpardai qylyp topqa qosqan Elbasyǵa rahmet. Nuraǵamyzdyń bastaǵan jolyn ary qarai jalǵastyryp jatqan Memleket basshymyz Qasym-Jomart Kemelulynyń qamqorlyǵyna, jasap jatqan marapattaryna sheksiz alǵysymdy bildiremin. Parlament qabyrǵasyndaǵy ómirim óte bir sátti kezeń dep bilemin. Endi, qai jerde elge, memleketke paidam kóbirek tiedi, sol jerde bolǵandy mindet dep tanyǵandyqtan, ómirdiń kelesi kezeńine qadam basyp jatyrmyn.
Biraz jumys istedik, artyq aitqan sózimiz bolsa, jaza basqan jerimiz bolsa, keibir áriptesterimnen keshirim suraimyn, ǵafý ótinemin", - dedi Tileýhan.
Eks-depýtat qarapaiym sailaýshy retinde áriptesterine óz amanatyn da jetkizdi.
"Sondai-aq sóz-túiindi aitarym bar ǵoi, aǵaiyn. Qazaq deitin ulttyń tiliniń, mádenietiniń, tarihynyń, ǵylymynyń, rýhaniiatynyń, salt-dástúriniń Qazaqstan Respýblikasynan basqa barar jeri, basar taýy joq, basqa damityn jeri joq. Qazaq – ol shabýylshy jurt emes, qorǵanýshy jurt, tarihta esesi ketken jurt. Osy nárse esterińizde bolyp, parasat kózderińiz tarihi sanamen, memleketshildik oimen árqashan júrekterińizdiń túkpirinde tursa eken degen ótinishim bar. Muny depýtat retinde emes, sailaýshy retinde aityp otyrmyn. Isterińizge bereke tileimin", - dedi Tileýhan.
Eske sala keteiik, májilis otyrysynda depýtat Bekbolat Tileýhannyń ókilettigi merziminen buryn toqtatyldy. Ortalyq sailaý komissiiasynyń múshesi Asylbek Smaǵulovtyń aitýynsha, ol mindetterin atqarýdan óz erkimen bosatý týraly ótinish bergen.
Májilis tóraǵasy Nurlan Nyǵmatýlin áriptesine jańa qyzmette sáttilik tilep, alǵys hat tabystady.
Sondai-aq, eks-depýtat Búkilálemdik etnosport konfederatsiiasynyń birinshi vitse-prezidenti bolyp taǵaiyndaldy.
