Memleketaralyq aviatsiia komitetiniń bas direktory Viktor Sorochenko Bek Eir ushaǵynyń apatqa ushyraýynyń basty sebebin atady, dep habarlaidy QazAqparat.
«Mundai aviatsiialyq oqiǵalar buǵan deiin de bolǵan. Apatty jaǵdaida ushýdy oryndaý barysyn biz Frantsiiada 2007 jyly baiqaǵan edik. Memleketaralyq aviatsiia komitetiniń mamandary bul apatty jan-jaqty tekserip, saraptama jasadyq. Atalǵan aviatsiialyq oqiǵaǵa bailanysty Frantsiia biligi bizge barlyq málimetterdi, ushý parametrlerin usynǵan bolatyn. Al biz sol oqiǵa kezindegi ushý parametrleri men ótken jyldyń 27 jeltoqsanynda Almatydaǵy ushaq ushýynyń parametrlerin salystyryp shyqtyq. Osy eki aviatsiialyq oqiǵa parametrleriniń uqsas ekendigin aita alamyn», - dedi ol.
Onyń dereginshe, aerodinamikasy óte uqas bolyp keletin Fokker F28 jáne Fokker 100 ushaqtary 106 ret apatqa ushyraǵan. Sonyń kemi segizinde ushaqtyń ushyp shyǵý barysynda qulaýyna qanattarynyń betine muz qatý sebep bolǵan. Al Bek Eir ushaǵy Almaty áýejaiynan 6 metr kóterilgennen keiin sol qanatyna 5 gradýsqa odan keiin oń jaqqa qarai 19 gradýsqa kúrt aýytqyǵan.
«Men ushaq apatynyń eki ǵana sebebin kórip otyrmyn. Olar: qanattardyń zaqymdanýy, búlinýi, kóterý qabileti tómendeýi nemese muz qatý. Komissiia aviatsiialyq oqiǵa oryn alǵannan keiin áýe kemesin qarap shyǵyp, qanattarynyń zaqymdanbaǵandyǵyn anyqtady. Men tájiribeme súienip, aitarym, munan ózge sebebin kórip te turǵan joqpyn. Sondyqtan biz ushaq qanattaryna muz qatty degen nusqaǵa eń birinshi kezekte mán beremiz», - dedi Viktor Sorochenko.
