2019 jylǵy 27 jeltoqsanda Almaty qalasy áýe ailaǵynyń aýmaǵynda Bek Air áýekompaniiasynyń Fokker-100 áýe kemesi ushyraǵan apatqa bailanysty oqiǵany tekserý jumystary aiaqtaldy, - dep habarlaidy "Ult aqparat" Indýstriia jáne infraqurylymdyq damý ministrligine silteme jasap.
"QR áýe keńistigin paidalaný jáne aviatsiia qyzmeti týraly" 2020 jylǵy 15 shildedegi №339-IV Zańǵa sáikes ushaq apatyn azamattyq aviatsiia salasyndaǵy ýákiletti organ qurǵan komissiia tekserdi.
"Halyqaralyq zańnamaǵa jáne Qazaqstan Respýblikasynyń zańnamasyna sáikes komissiia jumysyna Niderland Koroldiginiń qaýipsizdik jónindegi biýrosynyń ókilderi (aviatsiialyq oqiǵalardy tekserý jónindegi memlekettik organ) jáne olardyń keńesshileri – niderlandtyq Fokker Services B. V. kompaniiasynyń mamandary (Fokker úlgisindegi áýe kemesi sertifikatynyń iesi), sondai-aq Memleketaralyq aviatsiia komitetiniń tekserýshileri qatysty.
Halyqaralyq azamattyq aviatsiia uiymy keńesiniń (ICAO) Chikago konventsiiasynyń 13-qosymshasyna jáne Qazaqstan Respýblikasynyń zańnamasyna sáikes tekserý nátijeleri boiynsha qorytyndy esep Niderland Koroldiginiń qaýipsizdik jónindegi biýrosymen, Memleketaralyq aviatsiia komitetimen kelisildi" - delingen habarlamada.
Osylaisha, "Bek Eir" AQ áýe kemesimen bolǵan aviatsiialyq oqiǵa ushaq áýege kóterilgen kezde qanatynyń kúsh túsetin qasietteriniń simmetriiasyn joǵaltýy nátijesinde oryn alǵany anyqtaldy. Sonyń kesirinen ushaq ushý-qoný jolaǵynan kóterilgennen keiin fiýzeliajǵa qulap, qar basqan topyraqtyń betimen ońǵa qarai aýyp ketken, odan keiin áýejaidyń perimetr boiynsha qorshaýyn buzyp, atalǵan qorshaýdan 9-10 metr qashyqtyqta ornalasqan eki qabatty jeke menshiktegi qurylys nysanyna soǵylǵan.
Komissiia qorytyndysyna sáikes, ushaq qanatynyń kúsh túsetin qasietterin joǵaltýynyń sebebi jer ústindegi muzdanýdyń áseri bolýy yqtimal.
