«Bek Air» áýe kompaniiasynyń 27-31 jeltoqsan aralyǵyna josparlanǵan barlyq reisteri oryndalmaidy, dep habarlaidy "Ult aqparat" QR Indýstriia jáne infraqurylymdyq damý ministrliginiń baspasóz qyzmetine silteme jasap.
«Bek Air» áýe kompaniiasy ushyrylymdarynyń ýaqytsha toqtatylýyna bailanysty 2019 jylǵy 27-31 jeltoqsan kúnderi aralyǵyna josparlanǵan áýe kompaniiasynyń Nursultan-Qyzylorda, Qyzylorda - Nur-Sultan, Nur-Sultan - Atyraý, Atyraý - Shymkent, Shymkent - Nur-Sultan, Nur-Sultan - Almaty, Almaty - Oral, Oral - Almaty, Almaty - Aqtaý, Aqtaý - Almaty, Almaty - Pavlodar, Pavlodar - Almaty, Aqtaý - Shymkent, Atyraý - Almaty, Nur-Sultan - Shymkent, Almaty - Nur-Sultan, Shymkent - Atyraý, Atyraý - Nur-Sultan, Nur-Sultan - Almaty, Shymkent - Aqtaý baǵyttary boiynsha 100-ge jýyq reisi oryndalmaidy. Bul baǵyttarǵa barlyǵy 9157 bilet (8180 eresek, 765 bala, 212 náreste) satylǵan.
«Qazirgi ýaqytta áýe kompaniiasy 2019 jylǵy 31 jeltoqsanǵa deiin josparlanǵan barlyq reisterge biletterdiń tolyq qunyn qaitaryp jatyr» dep málim etti ministrlikten.
2020 jylǵy qańtardyń 3-10 aralyǵyna (2020 jylǵy 1-2 qańtarǵa reister aldyn ala josparlanbaǵan) «Bek Air» áýe kompaniiasynyń reisterine 9785 (8307 eresek, 1153 bala, 325 náreste) bilet satylǵan.
Osyǵan orai ushyrylmaityn reisterdiń jolaýshylaryna ózge áýe kompaniialardyń qyzmetin paidalanýǵa, sondai-aq basqa kólik túrlerin qarastyrýǵa keńes beriledi.
«Otandyq áýe kompaniialarynyń málimetinshe, «Bek Air» áýe kompaniiasynyń reisteri oryndalmaitynyna bailanysty biletterdiń quny kóterilgen joq. Tiisinshe, bolǵan apatqa orai áýe biletteri baǵasynyń sharyqtap ketkeni jónindegi aqparat shyndyqqa janaspaidy. Óitkeni, Jańa jyl qarsańynda jáne demalys kúnderi biletterdiń quny basqa kúnderge qaraǵanda burynnan qymbatyraq bolady. Jalpy biletti óz baǵasyna alý úshin deldaldardyń qyzmetine júginbei, áýe kompaniialarynyń resmi saittarynan jáne akkredittelgen satý núktelerinen alýǵa keńes beriledi» delingen habarlamada.
«Air Astana» jáne «Qazaq Air» áýe kompaniialarynyń málimetinshe, toqtatylǵan reisterdiń jolaýshylary 2019 jylǵy 31 jeltoqsanǵa deiin sáikes baǵyttarǵa bos oryn bolǵan jaǵdaida «Bek Air» áýe kompaniiasynyń reisterine alynǵan bilet qunymen tasymaldanady. Ol úshin biletterdi tikelei «Air Astana» jáne «Qazaq Air» áýe kompaniialarynyń kassalarynan alý kerek. «SCAT» áýe kompaniiasy kórsetilgen merzimge deiin bos oryndar bolǵan jaǵdaida «Bek Air» áýe kompaniiasy jolaýshylaryn qabyldaidy. Oǵan «Bek Air» áýe kompaniiasynyń ókili usynǵan jolaýshylardyń málimetteri kórsetilgen tabystaý tizimdemesi negiz bola alady.
Sonymen qatar, «Air Astana» 2019 jylǵy 28 jeltoqsanǵa Nur-Sultan men Almaty qalalary arasynda qosymsha reister ashty. Olar jergilikti ýaqytpen saǵat 05:00-de jáne 10:00-de ushady. Apattan zardap shekkenderdiń jaqyn týystary tegin tasymaldanady. Oǵan qosa, jańajyldyq merekeler men demalys kezeńinde «Air Astana» áýe kompaniiasy Almatydan Nur-Sultan, Aqtóbe, Aqtaý jáne Atyraý qalalaryna qosymsha reister ashady.
Koll-ortalyq telefondary:
- «Qazaqstannyń avitsiialyq ákimshilig» AQ +77172613187;
- «Air Astana» áýe kompaniiasy +77172584477, +77272444477, +77027024477;
- «SCAT» áýe kompaniiasy +77252998880 (ishki 277, 278);
- «Qazaq Air» áýe kompaniiasy +77273561414;
- «Bek Air» áýe kompaniiasy +77273545000, +77017334576.
