Qazaqstandyq aviatsiialyq ákimshiliktiń bas direktory Piter Griffits 2019 jylǵy 27 jeltoqsanda Almaty mańynda Bek Air áýekompaniiasy ushaǵynyń apatqa ushyraýyna qatysty tergeýge túsinik berdi. Onyń málimeti boiynsha, áýeakompaniiany jaýapkershilikke tartý josparlanbaǵan, - dep habarlaidy Tengrinews.kz.
Griffittiń aitýynsha, jospar boiynsha tergeý 31 mamyrda aiaqtalýy kerek bolǵan.
"Bul merzimdi jinalysta Aviatsiialyq oqiǵalar men oqys oqiǵalardy tekserý basqarmasyna Indýstriia jáne infraqurylymdyq damý ministrligi qoidy", - dedi ol.
Alaida, búginde tergeý nátijeleri áli joq.
"Aviatsiialyq oqiǵalar men oqys oqiǵalardy tekserý basqarmasy tergeýdi áli aiaqtaǵan joq. Ol basqa baǵytqa qurylǵan - ne Almaty áýejaiyn jaýapkershilikke tartqysy keledi, ne Bek Air áýe kemesiniń aldynda áýege kóterligen Airbus A321LR áýe kemesinen qalǵan aýa aǵynynan týyndaǵan másele. Nátijesinde ushaq apaty úshin jaýapkershilikti eshkim moinyna almaidy", - dedi Griffits.
Ol Bek Air áýekompaniiasy jaýapkershilikke tartylmaitynyn rastady.
Sondai-aq, Griffits Qazaqstannyń Aviatsiialyq ákimshiligi áýekompaniianyń sertifikatyn uzartýǵa nege jol bergenin aityp berdi.
"Eýroodaqtyń alańdaýshylyǵyna qatysty. Olar Bek Air týraly biletin, men de Bek Air týraly Qazaqstanǵa kelgenge deiin bilgenmin. Áýekompaniia is júzinde Niderlandydan basqarylady. Barlyq áýe kemeleri Niderlandy uiymyna tiesili. Bul kompaniia Qazaqstanda 1993 jyldan bastap jumys isteidi. Bul bárine belgili bolatyn.
Másele mynada, bul uiymǵa shara qoldaný úshin jetkilikti materialdar men rastaityn qujattardy jinaý qajet boldy. 2019 jyly bizde jetkilikti dálelder bolǵan joq. Sertifikatty uzartýǵa ótinish berilgen kezde uiymda tek 40 adam jumys istedi, olardyń 23-i Azamattyq aviatsiia komitetinen (AAK) berildi", - dep túsindirdi Griffits.
Aviatsiia ákimshiligi 2019 jyldyń tamyzynda qurylǵan.
"2019 jyly inspektsiia AAK-da bolǵan eski erejeler boiynsha júrgizildi. Tiisinshe, eshqandai zańbuzýshylyqtar anyqtalǵan joq. Inspektsiia tómen deńgeide ótti, biraq zańnamaǵa sáikes olardyń sertifikatyn jańartpaýǵa negiz bolǵan joq.
Apattan keiin olardyń sertifikatyn qaitaryp aldyq, óitkeni zańbuzýshylyqtar aiqyn boldy. Eger biz tiisti sharalardy ýaqytynda qabyldasaq, bul bolmaityn edi. Adamdar ólmeýi kerek edi", - dedi Piter Griffits.
Qazaqstannyń Aviatsiialyq ákimshiligi ushaq apatyn tergeýge qatyspaidy. Biraq Piter Griffits Ulybritaniiada aviatsiialyq apattardy zertteý kýrsynan sabaq bergen.
"Áýe apattaryn tergeý kezinde ereje bar: apatqa qatysqan elderge habar berilýi qajet. Mysaly, bortta otyrǵan basqa el azamattary bolsa, eger áýe kemesi basqa elge, sondai-aq áýe kemesin óndirýshi elge tiesili bolsa.
Qazaqstandyq uiymdardan basqa, oqiǵa týraly Ulybritaniia, Germaniia, Niderlandy siiaqty tórt eldiń uiymdary, sondai-aq ushý qaýipsizdigin qamtamasyz etý jónindegi Eýropalyq agenttikke habarlandy. Sol kezde olar tergeýge qatysý úshin Qazaqstanǵa jiberiletin inspektorlardy anyqtady. Bir kúnnen keiin olardy óz elderine qaitardy. Olarǵa qatysý qajet emes dep aityldy. Bul sheshimdi Aviatsiialyq oqiǵalar men oqys oqiǵalardy tekserý basqarmasy qabyldady", - dedi Piter Griffits.
TMD-dan Memleketaralyq aviatsiia komitetiniń (MAK) mamandary ushý derekterine alǵashqy taldaý júrgizdi jáne byltyr maýsymda óz taldaýlaryn usyndy.
Griffits halyqaralyq erejelerge sáikes múddeler qaqtyǵysyn boldyrmaý úshin táýelsiz uiym aviatsiialyq oqiǵalardy tekserýi kerek dedi.
Buǵan deiin senator Talǵat Musabaev azamattyq aviatsiiadaǵy aviatsiialyq oqiǵalar men intsidentterdi tekserýdi Tótenshe jaǵdailar ministrligine nemese táýelsiz halyqaralyq óńirlik tergeý organdaryna berýdi talap etken bolatyn.
Maýsymnyń basynda Indýstriia jáne infraqurylymdyq damý ministri Beibit Atamqulov pandemiiaǵa bailanysty ushaqtyń apatqa ushyraýyna qatysty tergeý jalǵasyp jatqanyn aitty.
Aita keteiik, ushaq apaty 2019 jyldyń 27 jeltoqsanynda bolǵan. Bek Air áýe kompaniiasynyń kemesi Almaty áýejaiynyń mańynda apatqa ushyrady. Bortta 93 jolaýshy men bes ekipaj múshesi boldy, 12 adam qaza tapty.
